हामी सबैकाे संसारन्यूज

चितवन । चितवनको इच्छाकामना गाउँपालिका–५ मुग्लिङस्थित सार्वजनिक शौचालय नजिक सडकमाथिबाट पहिरो खस्दा मुग्लिङ–नारायणगढ सडकखण्ड दुईतर्फी अवरुद्ध भएको छ।

प्रहरीका अनुसार आज दिउँसो करिब २:०० बजे सडकमाथिबाट अचानक पहिरो खसेपछि सडक पूर्ण रूपमा अवरुद्ध भएको हो। घटनापछि सडक विभागसँग समन्वय गरी डोजरको सहायताले पहिरो पन्छाउने काम भइरहेको प्रहरीले जनाएको छ।

सडक अवरुद्ध भएपछि उक्त मार्गमा चल्ने सवारीसाधन दुवैतर्फ रोकिएका छन्। पहिरो हटाएर सडक सञ्चालनमा ल्याउने प्रयास जारी रहेको जनाइएको छ।

प्रहरीले यात्रु तथा सवारी चालकलाई आवश्यक सतर्कता अपनाउन र सडक सञ्चालनसम्बन्धी आधिकारिक जानकारीपछि मात्र यात्रा गर्न आग्रह गरेको छ।