हामी सबैकाे संसारन्यूज

काठमाडौं । निर्वाचन आयोगले नेपाली कांग्रेसको विशेष महाधिवेशनलाई कानुन तथा पार्टी विधानअनुसार भएको ठहर गर्दै त्यसबाट चयन भएका पदाधिकारीहरूको विवरण अद्यावधिक गर्ने निर्णय गरेको छ।

शुक्रबार बसेको आयोगको बैठकले विशेष महाधिवेशन वैधानिक रहेको निष्कर्ष निकाल्दै महाधिवेशनबाट निर्वाचित पदाधिकारीहरूलाई आधिकारिक मान्यता दिने निर्णय गरेको हो। यससँगै विशेष महाधिवेशनबाट गरिएका सबै निर्णयहरू कार्यान्वयनयोग्य हुने भएका छन्।

विशेष महाधिवेशनलाई अमान्य ठहर गर्नुपर्ने भन्दै शेरबहादुर देउवा समूहले पेश गरेको दाबी आयोगले अस्वीकार गरेको छ। आयोगको निर्णयसँगै देउवा नेतृत्वको पुरानो कार्यसमिति स्वतः निष्क्रिय भएको छ।

अब पार्टीभित्र प्रत्यक्ष मनोनयनदेखि अन्य संगठनात्मक निर्णय तथा गतिविधिहरू गगन–विश्व समूहको नेतृत्वमा हुनेछन्, जुन आधिकारिक रूपमा मान्य हुने आयोगले जनाएको छ।

यद्यपि निर्वाचन आयोगको यस निर्णयप्रति असन्तुष्ट पक्षका लागि सर्वोच्च अदालतमा जाने कानुनी बाटो भने खुला नै रहेको छ।