हामी सबैकाे संसारन्यूज

काठमाडौं । प्रभु बैंकका प्रमुख कार्यकारी अधिकृत अशोक शेरचनले आफ्नो जिम्मेवारीबाट अलग भएका छन्। बैंकको सञ्चालक समितिले उनीमाथि लगाइएको निलम्बन हटाएपछि शेरचनले औपचारिक रूपमा राजीनामा दिएका हुन्।

यसअघि बैंकिङ कसुरसम्बन्धी मुद्दामा केन्द्रीय अनुसन्धान ब्यूरो (सीआईबी) ले शेरचनलाई पक्राउ गरेपछि बैंकले उनलाई निलम्बन गरेको थियो। अनुसन्धानका क्रममा पर्याप्त प्रमाण नदेखिएको भन्दै विशेष सरकारी वकिलको कार्यालयले उनलाई हाजिर जमानीमा छाड्ने निर्णय गरेको थियो।

प्रहरीले पटक–पटक म्याद थपको माग गरेपछि उच्च अदालत पाटनले अन्तिम पटकका लागि पाँच दिनभित्र बयान प्रक्रिया सक्न निर्देशन दिएको थियो। सो समयावधि समाप्त भएपछि सरकारी वकिल कार्यालयले निर्णय गर्दै शेरचनलाई रिहा गरेको हो। यद्यपि, सीआईबीले अनुसन्धान प्रतिवेदन हालसम्म वकिल कार्यालयमा बुझाइसकेको छैन।

हाजिर जमानीमा रिहा भएपछि प्रभु बैंकको सञ्चालक समितिले शेरचनमाथिको निलम्बन फुकुवा गरेको थियो। त्यसपछि उनले सीईओ पदबाट अलग हुने निर्णय गरेका हुन्।

बैंकिङ क्षेत्रमा करिब तीन दशक लामो अनुभव बोकेका शेरचनले प्रभु फाइनान्स र प्रभु विकास बैंकमा प्रमुख कार्यकारी अधिकृतको रूपमा काम गरिसकेका छन्। किस्ट बैंकसँगको मर्जरपछि बनेको प्रभु बैंकमा उनी सुरुमा नायब प्रमुख कार्यकारी अधिकृत बनेका थिए र पछि सीईओको जिम्मेवारी सम्हालेका थिए।

उनको कार्यकालमा प्रभु बैंकले ग्रान्ड बैंक, सेञ्चुरी बैंकलगायत विभिन्न बैंक तथा वित्तीय संस्थासँग मर्जर गर्दै आफ्नो आकार र पहुँच विस्तार गरेको थियो।