हामी सबैकाे संसारन्यूज

बैंकद्वारा जारी प्रेस विज्ञप्तिअनुसार कान्तिपुर दैनिक मा वैशाख ९ गते प्रकाशित समाचारमा ‘अनुसन्धानरत निकायबाट प्राप्त विवरण’ उल्लेख गरिएको भए पनि त्यसलाई बेवास्ता गर्दै बैंकमाथि आरोप लगाइएको भन्दै आपत्ति जनाएको छ।

बैंकले ग्राहकको विवरण कुनै पनि अवस्थामा अनधिकृत व्यक्ति वा निकायलाई उपलब्ध नगराइने स्पष्ट पारेको छ। ग्राहक स्वयं, आधिकारिक प्रतिनिधि वा कानूनी प्रक्रिया पूरा गरी माग गर्ने नियामक तथा अनुसन्धान निकायबाहेक अरू कसैलाई त्यस्तो सूचना नदिइने विज्ञप्तिमा उल्लेख छ।

त्यस्तै, बैंकको कोर बैंकिङ प्रणालीमा ग्राहकसम्बन्धी विवरण कसले, कहिले र कुन प्रयोजनका लागि हेरेको हो भन्ने सम्पूर्ण अभिलेख सुरक्षित रहने व्यवस्था रहेको जनाइएको छ।

बैंकले आफूमाथि लगाइएका आरोपहरू पूर्ण रूपमा गलत र नियोजित दुष्प्रचार भएको दाबी गर्दै यस्ता गतिविधि नगर्न आग्रह गरेको छ। साथै, दुष्प्रचारमा संलग्न व्यक्तिमाथि विद्युतीय कारोबार ऐन, २०६३ लगायत प्रचलित कानूनअनुसार कारबाही अघि बढाइने चेतावनी दिएको छ।

चार दशकभन्दा बढीको अनुभवसहित सेवा दिँदै आएको बैंकले ग्राहक सूचनाको गोपनीयता कायम राख्नु आफ्नो प्रमुख दायित्व भएको उल्लेख गर्दै यस्ता भ्रमपूर्ण सूचनामा विश्वास नगर्न सबै सरोकारवालालाई अनुरोध गरेको छ।