हामी सबैकाे संसारन्यूज

काठमाडौं । नेपाल समाजवादी पार्टी (नयाँ शक्ति) का अध्यक्ष तथा पूर्वप्रधानमन्त्री डा बाबुराम भट्टराईले सुनसरीको देवानगञ्जमा भएको साम्प्रदायिक हिंसाप्रति गम्भीर चिन्ता व्यक्त गर्दै स्थिति थप जटिल हुन नदिन सबै पक्षलाई उच्च विवेक र संयम अपनाउन आग्रह गरेका छन्।

सामाजिक सञ्जालमार्फत आफ्नो धारणा सार्वजनिक गर्दै भट्टराईले सुनसरीको देवानगञ्जमा एक युवकको मृत्यु हुने तथा सुरक्षाकर्मीसहित २२ जना गम्भीर घाइते हुने घटना अत्यन्त गम्भीर र चिन्ताजनक भएको बताएका छन्।

उनले विज्ञान र प्रविधिको तीव्र विकास, बदलिँदो भू–राजनीतिक परिवेश तथा नेपालमा संघीय लोकतान्त्रिक गणतन्त्र संस्थागत हुँदै गएको वर्तमान अवस्थामा यस्ता अवाञ्छित र हानिकारक घटनाले राष्ट्रिय एकता, सामाजिक सद्भाव र राजनीतिक स्थिरतामाथि चुनौती सिर्जना गर्न सक्ने उल्लेख गरेका छन्।

भट्टराईले हालै गठन भएको नयाँ सरकार, सबै राजनीतिक दल तथा आम नागरिकलाई यस्ता घटनाप्रति जिम्मेवार र संवेदनशील बन्न आग्रह गर्दै कुनै पनि बहानामा देशलाई पुनः अविकास र अस्थिरताको भुमरीमा फस्न दिन नहुने बताएका छन्।

“आगामी दिन अझ चुनौतीपूर्ण हुन सक्छन्। त्यसैले सबैले उच्च विवेक र संयमका साथ व्यवहार गर्न आवश्यक छ,” उनले भनेका छन्।

भट्टराईले इतिहासबाट पाठ सिक्दै राष्ट्रिय हितलाई केन्द्रमा राखेर अघि बढ्नुपर्नेमा जोड दिँदै देशलाई विभाजन, हिंसा र अस्थिरतातर्फ लैजाने कुनै पनि गतिविधिलाई निरुत्साहित गर्न सबै पक्षको साझा जिम्मेवारी रहेको बताएका छन्। “हामीले अहिले पनि विवेक गुमायौं भने इतिहासले कसैलाई पनि क्षमा गर्ने छैन,” उनले उल्लेख गरेका छन्।