हामी सबैकाे संसारन्यूज

काठमाडौँ । नेपाली कांग्रेसका पूर्व उपसभापति तथा पूर्वउपप्रधानमन्त्री गोपालमान श्रेष्ठको निधनप्रति श्रद्धाञ्जली अर्पण गर्न कांग्रेस नेतादेखि विभिन्न दलका शीर्ष नेताहरू पार्टी केन्द्रीय कार्यालय सानेपा पुगेका छन्। पार्टी कार्यालयमा श्रद्धाञ्जलीका लागि राखिएको श्रेष्ठको पार्थिव शरीरमा नेता–कार्यकर्ताले अन्तिम श्रद्धाञ्जली अर्पण गरेका थिए ।

श्रेष्ठप्रति अन्तिम श्रद्धाञ्जली अर्पण गर्न बुधबार बिहानैदेखि पार्टी केन्द्रीय कार्यालय सानेपामा नेता–कार्यकर्ता, शुभेच्छुक तथा सर्वसाधारणको भीड लागेको थियो।

कांग्रेस सभापति शेरबहादुर देउवासहित पार्टीका पदाधिकारी, पूर्वपदाधिकारी, सांसद, नेता तथा कार्यकर्ताले श्रेष्ठको पार्थिव शरीरमा पुष्पहार अर्पण गर्दै श्रद्धाञ्जली व्यक्त गरेका थिए। विभिन्न राजनीतिक दलका नेताहरू पनि सानेपा पुगेर श्रद्धाञ्जली अर्पण गरेका थिए ।

श्रेष्ठको योगदानको स्मरण गर्दै नेताहरूले नेपाली लोकतान्त्रिक आन्दोलन, बहुदलीय व्यवस्था स्थापना तथा संसदीय लोकतन्त्रको सुदृढीकरणमा उनको भूमिका ऐतिहासिक रहेको बताएका थिए । श्रेष्ठ लामो समयसम्म नेपाली कांग्रेसको संगठन निर्माण र लोकतान्त्रिक आन्दोलनमा सक्रिय रहेका थिए।

पार्टी कार्यालयमा श्रद्धाञ्जली अर्पणका क्रममा केही समय मौनधारणसमेत गरिएको थियो। श्रद्धाञ्जली कार्यक्रमपछि श्रेष्ठको पार्थिव शरीर पशुपति आर्यघाटमा अन्त्येष्टि गरिएको छ।