१४ असोज, राजविराज । विभिन्न मुद्दामा फरार आठ प्रतिवादीलाई सप्तरी प्रहरीले पक्राउ गरेको छ ।
जिल्ला प्रहरी कार्यालय सप्तरी र जिल्ला अदालतबाट खटिएको संयुक्त टोलीले दुई दिनमा फरार आठ अभियुक्तलाई पक्राउ गरिएको प्रहरी भीमप्रसाद ढकालले बताउनुभयो । जिल्ला अदालत राजविराजबाट ज्यान मार्ने उद्योग मुद्दामा ६ महिना १८ दिन कैद पाएर विगत १६ वर्षदेखि फरार रहेका जोगिनिया–२ ९हाल हनुमाननगर योगिनिमाई नपा–२० बस्ने खुसीलाल मण्डल र मिश्रीलाल मण्डललाई प्रहरीले पक्राउ गरेको छ । घरबाटै पक्राउ परेका उनीहरुलाई जिल्ला अदालतले २०५७ माघ १३ गते ६ महिना १८ दिन कैद तोकेको थियो ।
यस्तै, सप्तरीको लालापट्टी–७ बस्ने ६५ वर्षीया साबित्रादेवी खङ्गको हत्या आरोपमा सोही ठाउँका ३० वर्षीया पञ्चदेव खङ्गलाई समेत कर्तव्य ज्यान मार्ने मुद्दामा फरार रहेका उनलाई प्रहरीले पक्राउ गरेको छ । त्यस्तै, बोक्सी मुद्दा आरोपमा फरार पाँच प्रतिवादीलाई प्रहरीले पक्राउ गरेको छ । पक्राउ पर्नेमा सप्तरीको इनरुवा–५ का राजाराम मण्डल, रामेश्वर मण्डल, दीपक मण्डल, दुःखी मण्डल र ब्रह्मदेव मण्डल रहेको जिल्ला प्रहरी कार्यालयले जनाएको छ ।
पक्राउ परेकालाई जिल्ला अदालतमा उपस्थित गराई राजविराजस्थित कारागारमा पठाइएको प्रहरी उपरीक्षक ढकालले बताउनुभयो ।
क्याम्पसमा चोरी
यसैबीच, सप्तरीको राजविराजस्थित महेन्द्र बिन्देश्वरी बहुमुखी क्याम्पसमा बुधबार राति चोरी भएको छ । करिब मध्यरातमा पाँच÷छजनाको समूहमा आएका चोरले क्याम्पसभित्र रहेको छवटा भवनमा लगाइएको ताल्चा फुटाएको क्याम्पस प्रमुख सर्वेशचन्द्र मिश्रले जानकारी दिनुभयो ।
उहाँका अनुसार क्याम्पसमा राति दुईजना पाले सुतेपनि मध्यरातमा चोरले क्याम्पसको पश्चिमी गेटको ढोका तोडेर पसेको र क्याम्पसभित्र रहेका प्राध्यापक सङ्घको कोठा, क्याम्पसको पश्चिम ग्रिलको कोठा, जेनेरेटर कोठा, कम्प्युटर कोठा र माथिलो तल्लामा रहेको विज्ञान सङ्कायको कोठाको ताला फुटाइएको बताइएको छ । ती चोरले क्याम्पसमा ताला फुटाए पनि राति असजिलो भएपछि खासै सामान लान भने नपाएको क्याम्पस प्रमुख मिश्रले भन्नुभयो । रासस
