हामी सबैकाे संसारन्यूज

२७ साउन, काठमाण्डौं । नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डले ईस्लामिक धर्मालम्बीहरुको महान पर्व इद–उल–अजहा (बकर ईद) को अवसरमा शुभकामना दिएका छन् ।

अध्यक्ष दाहालले सोमबार शुभकामना दिदैँ नेपाल बहुभाषिक, बहुसांस्कृतिक र विभिन्न धार्मिक समुदायहरुको साझा भूमि रहेको र देशको यही विविधता भित्रको एकता नै नेपाल र नेपाली जनताको पहिचान र विशेषता रहेको समेत बताएका छन् ।

अध्यक्ष दाहालले नेपाली जनताको राजनीतिक, सामाजिक र सांस्कृतिक अधिकारको प्रत्याभूत गर्ने वर्तमान संविधानले सबै धर्महरुको उत्तिकै सम्मान गरेको बताउँदै धार्मिक सहिष्णुताको चेतनाका लागि नेपाली समाज एक उदाहरणीय समाजका रुपमा गनिने पनि शुभकामना विज्ञप्तिमा जनाएका छन् ।

‘पुराना सोच, संरचना, मुल्य र मान्यतालाई व्यवहारत : विस्थापित गरि नयाँ सोच, मुल्य, मान्यता र संस्कृति अघि बढाउने चुनौती हामी सामु छ,’ अध्यक्ष दाहालले भनेका छन्, ‘समाजवादको आधार तयार गर्ने दिशा अनुरुप आफूलाई परिस्कृत गर्न आव्हान गर्दै यस पर्वका अवसरमा सम्पूर्ण नेपाली जनसमुदायमा सुख, शान्ति, समृद्धि, सुस्वास्थ्य र उत्तरोत्तर प्रगतिको कामना व्यक्त गर्दछु ।’