हामी सबैकाे संसारन्यूज

पर्वत । नेपालका अनाथ, असहाय, विपन्न, दलित तथा अल्पसंख्यक समुदायका बालबालिकालाई शिक्षा, संरक्षण र आत्मनिर्भर जीवनको अवसर प्रदान गर्ने उद्देश्यले सञ्चालित ‘सम्सारा घर’ परियोजनाले आत्मनिर्भरता अभियानतर्फ अर्को महत्वपूर्ण उपलब्धि हासिल गरेको छ।

राजेन्द्र अन्जना फाउण्डेशनका सह-अध्यक्ष लोक प्रसाद श्रेष्ठ ले पशुपालन कार्यक्रमका लागि निर्माण गरिने टहराको शिलान्यास गरेसँगै सम्सारा घरको दिगो जीवनयापन तथा आत्मनिर्भरता कार्यक्रमले नयाँ गति लिएको हो।

आयोजकका अनुसार उक्त संरचना केवल पशुपालनका लागि निर्माण गरिने भौतिक पूर्वाधार मात्र नभई असहाय तथा विपन्न बालबालिकाको भविष्य सुरक्षित र आत्मनिर्भर बनाउने दीर्घकालीन योजनाको महत्वपूर्ण आधार हो।

ARC for Nepal र राजेन्द्र अन्जना फाउण्डेशन को संयुक्त सहकार्यमा सञ्चालित सम्सारा घर नेपालभरिका अभिभावकविहीन, असहाय, विपन्न, दलित तथा अल्पसंख्यक समुदायका बालबालिकाका लागि स्थापना गरिएको आवासीय शैक्षिक गृह हो।

हाल सम्सारा घरमा १० जना बालबालिका आश्रित रहेका छन्। आगामी तीन वर्षभित्र प्रत्येक वर्ष पाँचदेखि सात वर्ष उमेर समूहका १०–१० जना बालबालिका थप गर्दै कुल ५० जना बालबालिकालाई आश्रय, गुणस्तरीय शिक्षा, स्वास्थ्य सेवा तथा सम्मानपूर्ण जीवन निर्माणको अवसर प्रदान गर्ने लक्ष्य लिइएको छ।

सम्सारा घरका अनुसार यहाँ आश्रय लिइरहेका धेरै बालबालिकाले अभिभावक गुमाउनुका साथै चरम गरिबी, सामाजिक विभेद, असुरक्षा र अवसरको अभावपूर्ण जीवन भोगेका छन्। उनीहरूका लागि सम्सारा घर केवल बस्ने ठाउँ नभई माया, सुरक्षा, शिक्षा र अवसरले भरिएको परिवार बन्ने प्रयासमा जुटेको छ।

हाल अस्थायी आवासमा एक शिक्षक, एक हेरचाहकर्ता, एक भान्से र एक सहयोगीसहित चार जना समर्पित कर्मचारीले बालबालिकाको शिक्षा, स्वास्थ्य, दैनिक हेरचाह तथा भावनात्मक विकासमा योगदान पुर्‍याइरहेका छन्।

संस्थाले माध्यमिक तहसम्मको शिक्षा सुनिश्चित गर्नुका साथै योग्य र इच्छुक विद्यार्थीहरूलाई स्नातक तहसम्म अध्ययनका लागि सहयोग गर्ने योजना अघि सारेको छ, ताकि उनीहरू भविष्यमा आत्मनिर्भर, जिम्मेवार र समाजप्रति उत्तरदायी नागरिकका रूपमा स्थापित हुन सकून्।

श्रेष्ठ परिवारद्वारा मानवीय सेवाका लागि उपलब्ध गराइएको करिब चार रोपनी (२१ हजार ९ सय वर्गफुट) जग्गामा आधुनिक तथा सुविधासम्पन्न भवन निर्माण भइरहेको छ। करिब ८ लाख अमेरिकी डलर (झण्डै १० करोड रुपैयाँ) लागत अनुमान गरिएको उक्त भवनको भव्य उद्घाटन सन् २०२७ को फेब्रुअरी महिनाको प्रारम्भमा गर्ने लक्ष्य राखिएको छ।

नयाँ भवनमा करिब २०० जना अट्ने क्षमताको बहुउद्देश्यीय सभाहल पनि निर्माण भइरहेको छ। उक्त सभाहललाई शैक्षिक कार्यक्रम, नेतृत्व विकास तालिम, डिजिटल सिकाइ, सांस्कृतिक गतिविधि, कार्यशाला तथा सामुदायिक कार्यक्रम सञ्चालनका लागि प्रयोग गरिने बताइएको छ।

सम्सारा घरले आत्मनिर्भरता कार्यक्रमअन्तर्गत भैंसी, बाख्रा तथा कुखुरा पालनसँगै अर्गानिक फलफूल, तरकारी र अन्य खाद्यान्न उत्पादन गर्ने योजना अघि बढाएको छ। यसबाट बालबालिकालाई स्वस्थ र पौष्टिक आहार उपलब्ध गराउनुका साथै कृषि, पशुपालन, वातावरण संरक्षण तथा दिगो जीवनशैलीसम्बन्धी व्यावहारिक ज्ञानसमेत प्रदान गरिने अपेक्षा गरिएको छ।

परियोजनालाई स्थानीय तथा अन्तर्राष्ट्रिय स्तरबाट समेत सहयोग प्राप्त भइरहेको छ। अमेरिकाको न्यू जर्सीस्थित फेयर लन सनराइज रोटरी क्लब तथा रोटरी इन्टरनेशनल को सहकार्यमा पुस्तकालय र कम्प्युटर प्रयोगशाला स्थापना भइरहेको छ, जसले बालबालिकालाई आधुनिक शिक्षा र डिजिटल सिकाइका अवसरहरू उपलब्ध गराउनेछ।

यस अभियानका प्रमुख अभियन्ता तथा ARC for Nepal का अध्यक्ष राजेन्द्र श्रेष्ठले आफ्ना व्यवसायहरूबाट प्राप्त हुने नाफाको ७५ प्रतिशत रकम बालबालिकाको शिक्षा, स्वास्थ्य, आवास तथा भविष्य निर्माणमा समर्पित गर्दै आएको बताइएको छ। ARC Beauty Salon, Himalayan Fresh Water लगायतका व्यवसाय तथा आगामी योजनाहरूबाट प्राप्त आम्दानीलाई यस मानवीय अभियानको दिगोपनाका लागि उपयोग गरिने जनाइएको छ।

सम्सारा घरले भवन मात्र निर्माण नगरी अवसरबाट वञ्चित बालबालिकालाई भविष्यका शिक्षक, नर्स, इन्जिनियर, उद्यमी, समाजसेवी र जिम्मेवार नागरिकका रूपमा तयार पार्ने दीर्घकालीन लक्ष्य लिएको छ।

थप जानकारीका लागि: www.arcfornepal.org