हामी सबैकाे संसारन्यूज

७ पुस, काठमाडौँ । सि.आर.भी. केशलियामार्ग विराटनगर, मोरङमा कार्यरत प्रहरी सहायक निरीक्षक श्यामकुमार दाहाल पक्राउ परेका छन् ।

मोरङमा कार्यरत प्रहरी दाहालले सेवाग्राहीलाई अनावश्यक दुःख हैरानी दिई बिभिन्न खाद्य सामग्रीहरु ओसारपसारमा सहजीकरण गरिदिने प्रयोजनको लागि घुस माग गरेको भन्ने सूचनाको आधारमा अख्तियार दुरुपयोग अनुसन्धान आयोगको टोलीले निजलाई सेवाग्राहीबाट रु ७ हजार घुस लिइसकेको अवस्थामा पक्राउ गरेको हो ।

अनुसन्धानको क्रममा सेवाग्राहीको व्यवसायमा प्रयोग हुने सवारी साधन चालक लगायतलाई बाटोमा अनावश्यक दुः ख नदिने कुनै किसिमको बाधा अवरोध नगर्ने चेकजाँच नगर्ने व्यवसायलाई सहज गराइदिने भनी उक्त रकम लिएको तथ्य प्रमाणित भएकाले निजलाई भ्रष्टाचार निवारण ऐन बमोजिम जरिवाना र कैद सजाय मागदाबी लिई आज विशेष अदालत, काठमाडौंमा आरोपपत्र दायर गरिएको अख्तियारले जनाएको छ ।