हामी सबैकाे संसारन्यूज

१४ फागुन, काठमाडौं । भारतको राजधानी दिल्लीमा बुधबार बिहानैदेखि हिंसा भड्किएको छ । नयाँ नागरिकतासम्बन्धी कानुनको विपक्षमा यसअघि पनि प्रदर्शन भएका थिए । गएको आइतबारदेखि प्रदर्शनले उग्र रुप लिएपछि हिंसा भड्किएको हो ।

बुधबार बिहानै दिल्लीको एक सुपरमार्केटमा आगजनी गरेर एक सटरमा आगो लगाईएको छ भने सयौं सटरमा तोडफोड गरिएको छ । मंगलबार साँझसम्म १३ जनाको ज्यान गएको उक्त प्रदर्शनमा बुधबार थप ७ जनाको ज्यान गएको बताईएको छ । प्रहरीको तर्फबाट आइतबार थप एकजनाको ज्यान गएको थियो । गुरु तेग बहादुर अस्पतालले एक विज्ञप्ति जारी गरी घाइतेहरु ल्याउने क्रम नरोकिएको र केहि घाइते गंभीर भएकोले मृतकको संख्या बढ्न सक्ने जनाएको छ ।

दिल्लीका छिमेकी राज्यहरू उत्तर प्रदेश र हरियाणासँगको सिमानामा निगरानी बढाइएको छ । गृह मन्त्रालयमा भएको बैठकपछि भारतका केन्द्रीय गृह मन्त्री अमित शाहले शान्तिको अपिल गर्दै हिंसा बढ्न नदिन सीमा नाकामा कडाइ गरिएको जानकारी दिए ।

यस्तै दिल्लीका मुख्यमन्त्री अरविन्द केजरीवालले दिल्लीमा भड्किएको हिंसा रोक्न थप सुरक्षा बल आवश्यक रहेको बताएका छन् । नयाँ नागरिकतासम्बन्धी कानुनको पक्ष र विपक्षमा रहेका प्रदर्शनकारीबीच झडप घाइतेको संख्या हजार कटेको बताइन्छ । दिल्लीको यो प्रदर्शन दशकौँयताको सबैभन्दा खराब हिंसात्मक भएको बताइन्छ । हिंसाले साम्प्रदायिक रुप लिंदा हिन्दू र मुस्लिम समुदायबीच झडप भएको भन्दै दिल्लीका मुख्यमन्त्री अरविन्द केजरीवालले वार्तामार्फत समाधान खोज्न पटक-पटक आग्रह गर्दै आएका छन् ।