हामी सबैकाे संसारन्यूज

३० फागुन, काठमाण्डौं । लुम्बिनी प्रादेशिक अस्पताल बुटवलमा कोरोना संक्रमणका विरामी भेटिएको भन्ने समाचार आएपछि यतिबेला बुटवलवासीमा त्रास छाएको छ ।

यस विषयमा अस्पतालका प्रमुख मेडिकल सुपरीटेन्डेन्ट डा. राजेन्द्र खनालले मौसमी रुघाखोकी लगायतका हामीले भोग्दै आएका लक्षणहरु देखिएकोले आशंका मात्र गरिएको तर त्यस्तो नभएको बताएका छन् ।

‘भर्खरको योङ्ग व्यक्तिमा निमोनिया देखिएकाले त्यस्तो आशंकामा सावधानी अपनाएर आइसोलेसनमा छुट्टै राखेर उपचार गरिएको हो । हामी अनुसन्धानमै छौं, आज नमुना पठाउँदैं छौं । जहासम्म रिर्पोट नेगेटिभ नै देखिनेछ ।’

डा. खनालले त्यस्तो डराउनुपर्ने अवस्था नरहेको बताउँदै विश्वव्यापी त्रास फैलिरहेका बेला नागरिकले आफै सतर्कता अपनाउनु पर्ने, रुघाखोकीका लक्षण देखिएका बेला भिडभाडमा नजाने, आफूलाई थप संक्रमण हुनबाट बचाउने र अरुलाई पनि बचाउनुपर्ने बताएका छन् ।

उनले बुटवलमा अब गर्मी लागिसकेको र बाहिरी देशमा मानिसहरुको त्यतिधेरै आवातजावत नभएकोले डराइहाल्नुपर्ने अवस्था नरहेको बताए । ‘भारत ठूलो देश भएको र त्यहाँ अन्तराष्ट्रियरुपमा आवत–जावत पनि बढी हुने भएकाले अलि डर हो । तर, यहाँ आत्तिइहाल्नु पर्ने अवस्था छैन ।’ डा. खनालले भने ।

डा. खनालले अस्पतालले अहिले दुईवटा आइसोलेसन तयारी अवस्थामा राखेको र आवस्यकता अनुसार थप गर्दै जाने बताएका छन् । ‘कोरोना संक्रमण विरुद्ध लड्नका लागि हामी तयारी अवस्थामा छौं ।’ डा खनालले संसारन्युजसँग भने ।