हामी सबैकाे संसारन्यूज

काठमाडौं । सरकारले हालसम्मको पीसीआर टेस्टमा मात्रै ३ अर्ब १८ करोडभन्दा बढि खर्च भएको जनाएको छ । शुक्रबार स्वास्थ्य मन्त्रालयले हालसम्म ५ लाख ७९ हजार ८९९ पिसिआर परीक्षण गरिएको र त्यसको निम्ति ३ अर्ब १८ करोड १४ लाख ४४ हजार ५ सय खर्च भएको जनाएको हो ।

मन्त्रालयका प्रवक्ता डा. जागेश्वर गौतमले एउटा पीसीआर टेस्टका लागि सरकारको ५ हजार ५ सय खर्च हुने बताए । उनका अनुसार त्यसमा पीपीई र माक्सलगायतको खर्च जोडिएको छैन् ।

गौतमले जनाएअनुसार ३० हजार ४ सय ८३ जनामा कोरोना पोजेटिभ भेटिँदासम्म एकजना संक्रमित पत्ता लगाउन एक लाख चार हजार ६ सय ३० रुपैयाँ खर्च भएको छ । त्यसबाहेक संक्रमण पुष्टि भएपछि उपचारमा पनि ठूलो धनराशी खर्च भएको छ ।

‘एउटा केस भेट्दाखेरी हाम्रो राज्यको १ लाख ४ हजार रुपैयाँ खर्च हुन्छ । त्यसपछिको उपचारमा पनि खर्च हुन्छ । एकजना व्यक्तिलाई आईसीयूमा ३० दिन राख्नु पर्यो भने ४ लाख ५० हजार रुपैयाँ तिर्नुपर्ने हुन्छ । यसरी कोरोनाको जाँच गर्ने, जाँचबाट पोजेटिभ पत्ता लगाउने, उपचार गर्न बहुत खर्चिलो छ’, प्रवक्ता गौतमले भने ।

निषेधाज्ञा र जनस्वास्थ्यको मापदण्ड पालना गर्दा आफ्नो शरीर र सरकारको खर्च पनि जोगिने उनको भनाई छ । उनले घरबाट ननिस्कन र अत्यावश्यक कामका लागि निस्कनै परे मास्कको प्रयोग गरि सामाजिक दुरीलाई कायम राख्न आग्रह गरे ।