हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)को सचिवालय बैठक पार्टी कार्यालय पेसिडाँडामा बसेको छ । बैठक यसअघि प्रधानमन्त्री निवास बालुवाटार र पार्टी केन्द्रीय कार्यालय धुम्बाराहीमा बस्दै आएको थियो ।

पार्टी एकतापश्चात पहिलो पटक पेरिसडाँडामा बसेको बैठकमा कुर्सी व्यवस्थापन भने विशेष खालको गरिएको छ । बैठकमा सबै सदस्यलाई समान रुपमा बस्नको लागि सोफाको व्यवस्था गरिएको छ ।

बैठकको मञ्च तिर दुई अध्यक्ष केपी शर्मा ओली र पुष्पकमल दाहाल ‘प्रचण्ड’को सोफा राखिएको छ भने अन्य सदस्यलाई क्रमशः राखिएको छ ।

नेकपाभित्र कुर्सी व्यवस्थापनमा विभेद गरिएको भन्दै बेला–बेला चर्को आलोचना हुने गरेको थियो । पटक–पटकका सचिवालय बैठकमा प्रधानमन्त्रीसमेत रहेका केपी शर्मा ओलीको कुर्सी बेग्लै र अध्यक्ष प्रचण्डसहित अन्यको बेग्लै गरि भिन्नता गरिएको थियो ।

गत असार १० देखि बसेको स्थायी समिति बैठकमा कुर्सी व्यवस्थापन गलत रुपमा गरिएको भन्दै नेताहरुले विरोध जनाएका थिए । बैठकको दोस्रो दिन कुर्सी खोसा खोससमेत भएको थियो ।