हामी सबैकाे संसारन्यूज

काठमाडौं । नेकपाका उपाध्यक्ष बामदेव गौतमकाबिरुद्धमा परेको मुद्दाको सुनुवाई आज पनि स्थगित भएको छ । संवैधानिक इजलाशमा हेर्दाहेर्दैमा रहेको मुद्दाको सुनुवाई न्यायाधीशहरुको गणपूरक संख्या नपुगेसँगै स्थगित भएको हो ।

यसअघि सर्वोच्च अदालतका न्यायाधीश पुरुषोत्तम भण्डारीलाई कोरोना सक्रमण देखिएपछि गौतमको मुद्दा हेर्दा हेर्दैको पेसी सूचीबाट हटाइएको थियो । गौतमको मुद्दा हेर्नका लागि प्रधान न्यायाधीश जबराले असोज १४ गते आफ्नै नेतृत्वमा दीपककुमार कार्की, हरिकृष्ण कार्की, ईश्वर खतिवडा र विश्वम्भरप्रसाद श्रेष्ठसहितको संवैधाननिक इजलास गठन गरेका थिए ।

स्रोतका अनुसार यसअघि संवैधानिक इजलासका एक सदस्य ईश्वर खतिवडा ‘आइसोलेशन’ मा बसेको कारण देखाउँदै गौतमको मुद्दा पेसीबाट हटाइएको थियो । बुधबार पनि खतिवडाको नेतृत्वमा संयुक्त इजलास तोकिएको थियो तर, मुद्दाको संवैधानिक इजलास भने स्थगित गरिएको छ ।

जानकारी अनुसार पर्सी ३० गते शुक्रबार पनि संवैधानिक इजलास तोकिने सम्भावना छैन । किनभने घटस्थापनापछि देशभरका न्यायालयमा सार्वजनिक बिदा हुन्छ । कोजाग्रत पूर्णिमाअघि अदालतहरु खुल्दैनन् । जसकारण बामदेवविरुद्वको मुद्दाको सुनुवाई दशैंअघि सम्भावना छैन् ।

०७४ मा सम्पन्न प्रतिनिधि सभा निर्वाचनमा गौतम बर्दिया निर्वाचन क्षेत्र नं। १ बाट पराजित भएका थिए । उनलाई कांग्रेस नेता सञ्जय गौतमले ७ सय ७५ मत अन्तरले पराजित गराएका थिए । प्रतिनिधि सभा निर्वाचनमा पराजित भए पनि राष्ट्रिय सभा सदस्य भएका गौतमविरुद्ध वरिष्ठ अधिवक्ता दिनेश त्रिपाठी र अधिवक्ता बद्रीराज भट्टले मनोनय बदर गर्न मागसहित रिट दायर गरेका थिए ।

दायर भएको रिटमा निवेदक, सरकारी वकिल र उनका केही कानुन व्यवसायीले बहस गरेपछि हेर्दाहेर्दै रहेको थियो। असोज २१ गते बुधबारका लागि हेर्दाहेर्दै रहेको मुद्दाको सुनुवाइ सर्वोच्चका एक न्यायाधीशमा कोरोना संक्रमण पुष्टि भएपछि रोकिएको थियो।