हामी सबैकाे संसारन्यूज

२९ असोज, काठमाडौँ । सर्वोच्च अदालतले कोरोना संक्रमितहरुलाई परीक्षामा दिनबाट वञ्चित नगर्न लोकसेवा आयोगलाई आदेश दिएको छ ।
कोरोना संक्रमितले आफू संक्रमित भएको स्वघोषणा गर्नुपर्ने र उनीहरु परीक्षा केन्द्रमै प्रवेश गर्न नपाउने भनी आयोगले बनाएको मापदण्डलाई सर्वोच्चले कार्यान्वयन नगर्न आदेश दिएको हो ।

लोकसेवा आयोगको मापदण्डले संक्रमित व्यक्तिहरु मात्र परीक्षा दिनबाट वन्चित भई उनीहरुको संविधान प्रदक्त अधिकारको समेत उल्लंघन हुन जाने फैसलामा भनिएको छ ।

के कसो भएको हो ? निवेदकको माग बमोजिमको आदेश किन जारी हुनु नपर्ने हो ? आदेश जारी हुनु नपर्ने भए सो को आधार कारणसहित लिखित जवाफ पेश गर्न सर्वोच्चले विपक्षीका नाउँमा कारण देखाउ आदेश जारी गरेको छ । १५ दिनभित्र महान्याधिवक्ताको कार्यालयमार्फत लिखित जवाफ पेश गर्न भनिएको छ ।

न्यायाधीश सपना प्रधान मल्लको इजलासले सबै परिक्षार्थीलाई सुरक्षित रुपमा परीक्षामा सामेल हुन पाउने व्यवस्था मिलाउन पनि आदेश दिएको छ ।