हामी सबैकाे संसारन्यूज

७ पुस, काठमाडौं । नेपाल कम्युनिस्ट पार्टी (नेकपा) का दुई पक्षले आज छुट्टाछुट्टै केन्द्रीय समितिको बैठक बोलाएका छन् । औपचारिक रुपमा विभाजन घोषणा नभएपनि विभाजनको नजिक रहेका ओली पक्ष र प्रचण्ड–माधव नेपालपक्षले छुट्टाछुट्टै केन्द्रीय समितिको बैठक बोलाएका छन् ।

यसअघि आफ्ना पक्षका सांसदहरु र संसदीय दलको छुट्टाछुट्टै बैठक गरिसकेका उनीहरुले आज केन्द्रीय कमिटीको पनि छुट्टा छुट्टै बैठक बोलाएर औपचारिक रुपमानै पाटी विभाजनको तयारीमा रहेको बुझिएको छ ।

प्रचण्ड–माधव नेपाल पक्षले प्रधानमन्त्री ओलीले असंबैधानिक कार्य गरेकाले पार्टीले कारबाही गर्ने जनाएको छभने ओली पक्षले प्रचण्ड–माधव नेपाल पक्षका निर्णयहरु आधिकारीक नहुने र एउटा गुटगत मात्र रहेको बताएकाे छ । अब बस्ने दुवै पक्षको केन्द्रीय समितिको बैठकबाट एकअर्का अध्यक्षलाई कारबाही गर्ने निर्णय गर्ने तयारीमा रहेको नेताहरुले बताएका छन् ।

आज बिहान ९ बजे बालुवाटारमा प्रधानमन्त्री केपी शर्मा ओली पक्षका केन्द्रीय सदस्यहरुको बैठक बोलाइएकोमा हाल सम्म बैठक हुन सकेको छैन भने  प्रचण्ड–माधव नेपाल पक्षका केन्द्रीय सदस्यहरुको बैठक कार्की ब्यांक्वेट बबरमहलमा दिउँसो एक बजे बोलाइएको छ । उनीहरुले प्रधानमन्त्री ओलीलाई अनुशासनको कारबाही गर्ने यसअघिको निर्णयलाई केन्द्रीय कमिटीको बैठकले अनुमोदन गर्ने तयारी गरेका छन् ।