Sansar News
पुस १२, काठमाडौं । नेत्रविक्रम चन्द ‘विप्लव’ नेतृत्वको नेकपाका कार्यकर्ता र प्रहरीबीच संखुवासभाको चैनपुरमा गोली हानाहान भएको छ ।
संखुवासभाका प्रमुख जिल्ला अधिकारी जीवनप्रसाद आचार्यका अनुसार चैनपुर–४ स्थित मैदानेमा विशेष सुराकीका आधारमा खटिएको जिल्ला प्रहरीको टोलीमाथि विप्लवका कार्यकर्ताले लक्षित गरि फायरिङ्ग गरेका थिए । विप्लवका कार्यकर्ताको फायरिङ्गपछि प्रहरीले जवाफी फायरिङ्ग गरेको आचार्यले जनाए ।
‘जिल्ला प्रहरी कार्यालयबाट खटिएको विशेष गस्ती देखेपछि विप्लव समुहबाट फायरिङ्ग भयो, उनीहरुको फायरिङ्ग पछि दोहोरो फायरिङ्ग भयो’, प्रमुख जिल्ला अधिकारी आचार्यले भने, ‘उनीहरु फायरिङ्ग गर्दै भाग्न सफल भए ।’
उनका अनुसार उक्त ठाउँमा विप्लवका जिल्ला इन्चार्ज रहेको विशेष जानकारीको आधारमा जिल्ला प्रहरीको टोली खोजीमा लागेको थियो । तर, उनीहरु फायरिङ्ग गर्दै भाग्न सफल भए ।
वि.सं.२०७७ पुस १२ आइतवार १९:०७ मा प्रकाशित
