हामी सबैकाे संसारन्यूज

१४ माघ, काठमाडौं । नेपालमा आजदेखि सुरुभएको कोरोना भाइरस विरुद्धको पहिलो खोप लगाएका सहिद शुक्रराज ट्रपिकल तथा सरुवा रोग अस्पताल टेकुका निर्देशक सागर राजभण्डारीले आफूलाई भाग्यमानी महसुस गरेको बताएका छन् ।

राजभण्डारीले खोपका विषयमा विभिन्न आशंका पैदा भएको भएपनि आफूलाई खोपका बारेमा राम्रोसँग थाहा भएको बताउँदै खोप लगाएपछि आफूलाई केही नभएको भन्दै खुसी व्यक्त गरे ।

‘यो खोप लगाएपछि के हुन्छ होला, बेहोस हुन्छ होला वा के हुन्छ होला भनेर मानिसहरु भनिरहेका थिए । मलाई थाहा छ यो भ्याक्सिन एकदमै सेफ छ,’ उनले भने, ‘मैले आफूलाई निकै भाग्यमानी ठानेको छु किनकी पहिलोपटक लगाएको हुँ । म स्वास्थ्यकर्मी हुँ । संस्थाको प्रमुखको हैसियतले सबैको जिम्मेवारी मैले लिनुपर्छ मैले लगाएपछि मेरा स्वास्थ्यकर्मीहरुको हौसला बढ्छ भनेर लगाएको हुँ ।’

उनले कतिपय साथीहरु तथा आफन्तले कोरोना विरुद्धको पहिलो खोप आफूले लगाउने भन्ने निर्णय किन लिएको भन्दै चिन्ता व्यक्त गरेको बताउँदै आफूले लगाउँदा दोधारमा रहेका स्वास्थ्यकर्मी साथीहरु सबैले सुरक्षित रहेछ भनेर लाइनमा बसेर लगाएकोमा आफूलाई खुसी लागेको बताए ।

उनले यो भ्याक्सिन अत्यन्तै सुरक्षित रहेको र खोप लगाउँदा त्यस्तो कुनै नराम्रो महसुस नभएको बताउँदै आफ्नो परिवार र समुदाय सबैलाई सुरक्षित राख्नका लागि खोप लगाउन समेत सबैलाई अनुरोध गरेका छन् ।