Sansar News
५ जेठ, काठमाडौँ । नेपाल प्रहरीका पूर्वमहानिरीक्षक खड्गजीत बरालको आज ९३ वर्षका उमेरमा आफ्नै निवास महाराजगञ्जमा निधन भएको छ ।
विसं २०२९ साउनदेखि २०३५ जेठसम्म नेपालका नवौँ प्रहरी महानिरीक्षक भएका उनी राजदूत पनि थिए । बरालले प्रहरी सङ्गठनको प्रणाली विकास गर्ने सिलसिलामा महत्वपूर्ण योगदान गरेका प्रहरी प्रवक्ता वसन्तबहादुर कुँवरले बताए ।
प्रहरीको राशन व्यवस्थापन, ब्यारेक, अस्पताल र प्रहरी स्कूल बनाउनमा उनका महत्वपूर्ण योगदान रहेको प्रहरी अधिकारीहरु स्मरण गर्छन् ।
नेपाल प्रहरीको श्रीवृद्धि र उन्नतिमा अतुलनीय योगदान पुर्याएका उनी सङ्गठनको युगपुरुषका रुपमा स्थापित भएका प्रहरी प्रधान कार्यालयले उल्लेख गरेको छ । पूर्वमहानिरीक्षक बरालको आजै पशुपती आर्यघाटमा अन्त्येष्टि गरिने जनाइएको छ ।
रासस
वि.सं.२०७८ जेठ ५ बुधवार १५:४४ मा प्रकाशित
