हामी सबैकाे संसारन्यूज

काठमाडौँ । हिमालयन बैंक लिमिटेडले चीन भ्रमण गर्ने नेपाली ग्राहकहरूलाई लक्षित गर्दै नेपालमै पहिलो पटक ’युनियन पे आरएमबी कार्ड’ सञ्चालनमा ल्याएको छ । बैंकले चीनको प्रसिद्ध कार्ड ब्रान्ड युनियनपेसँगको सहकार्यमा यो सेवा सुरु गरेको हो । यो नयाँ सेवाले चीन जाने नेपाली विद्यार्थी, व्यवसायी तथा पर्यटकहरूका लागि भुक्तानी प्रक्रियालाई निकै सुलभ र सहज बनाउने विश्वास लिइएको बैंकले जनाएको छ ।

यस कार्डको प्रयोगबाट ग्राहकहरूले चीन भ्रमण गर्दा त्यहाँका एटीएम, पीओएस, क्यूआर कोड एवं इकमर्स प्लेटफर्महरू मार्फत सहजै कारोबार गर्न सक्नेछन् । यो कार्डमार्फत हुने कारोबार चिनियाँ मुद्रामा नै सहजै भुक्तानी हुने भएकाले यो बजारमा उपलब्ध अन्य उपकरणहरूको तुलनामा निकै मितव्ययी र सर्वस्वीकार्य हुने पनि बैंकले जनाएको छ ।

नेपाल राष्ट्र बैंकको विदेशी विनिमय विभागद्वारा स्वीकृत सीमासम्मको रकम यस कार्डमा लोड गर्न सकिनेछ । ग्राहकहरूले यसलाई युनियनपेको सञ्जालसँग आबद्ध भएका अलिपे प्लस, वेच्याटपे र निहाओ चाइना जस्ता क्यूआर एवं अन्य माध्यमहरूमा जोडेर सिधै चिनियाँ मुद्रामै भुक्तानी गर्न सक्नेछन् ।

काठमाडौँको आयोजित एक कार्यक्रमका बीच हिमालयन बैंकका प्रमुख कार्यकारी अधिकृत अशोक शम्शेर राणा तथा युनियनपे इन्टरनेसनलकी उपाध्यक्ष ज्याङ बेइले संयुक्त रूपमा यो कार्ड सेवाको शुभारम्भ गरेका छन् ।