हामी सबैकाे संसारन्यूज

काठमाडौं । सिटी एक्सप्रेसमार्फत विश्वका विभिन्न मुलुकबाट नेपाल पैसा पठाउँदा लाग्ने सेवा शुल्क पूर्ण रूपमा मिनाहा हुने भएको छ।

नेपालका विभिन्न क्षेत्रमा हालै आएको विनाशकारी बाढी तथा पहिरोबाट प्रभावित परिवारलाई तत्काल आर्थिक सहयोग पुर्‍याउने उद्देश्यले सिटी एक्सप्रेसले यस्तो सुविधा ल्याएको हो। कम्पनीका अनुसार यो सुविधा अर्को सूचना जारी नभएसम्म कायम रहनेछ।

विपद्को कठिन घडीमा विदेशमा रहेका नेपालीले आफ्ना परिवार तथा प्रभावित आफन्तलाई सहज, छिटो र पूर्ण रकमसहित आर्थिक सहयोग पठाउन सकून् भन्ने उद्देश्यले बाढी आएको दिनदेखि नै सेवा शुल्क मिनाहा गरिएको कम्पनीले जनाएको छ।

यो सुविधाअन्तर्गत यूएई, साउदी अरब, कतार, कुवेत र ओमान लगायत खाडी मुलुकबाट नेपाल पठाइने रेमिट्यान्समा सेवा शुल्क लाग्ने छैन।

त्यस्तै, जापान, दक्षिण कोरिया, मलेसिया र अस्ट्रेलिया लगायत एसिया–प्रशान्त क्षेत्रबाट पनि निःशुल्क रेमिट्यान्स सेवा उपलब्ध हुनेछ। युरोपका बेलायत, रोमानिया, पोर्चुगल, माल्टा, डेनमार्क, क्रोएसिया, स्विडेन, नर्वे, जर्मनी र फ्रान्स बाट नेपाल पैसा पठाउँदा समेत सेवा शुल्क नलाग्ने कम्पनीले जनाएको छ।

यसैगरी, न्युजिल्यान्डबाट नेपाल पैसा पठाउँदा पनि सेवा शुल्क मिनाहा गरिएको छ।  कम्पनीका अनुसार विश्वभर रहेका सिटी एक्सप्रेस तथा यसका अन्य अन्तर्राष्ट्रिय च्यानलमार्फत यो सुविधा लागू गरिएको छ।