हामी सबैकाे संसारन्यूज

जेठ १३, काठमाडौं । सभामुख अग्निप्रसाद सापकोटाले संसद बैठक बोलाउन सक्ने संकेत गरेका छन् । बिहिबार कानूनविद्हरुसँगको परामर्शपछि उनले संविधान, देश र जनताको रक्षार्थ असाधारण निर्णय लिनसक्ने बताएका हुन् ।

‘संविधान र प्रतिनिधि सभा नियमावली अनुसार म चल्नुपर्छ। नेपाली जनताले ३३४ जनालाई सार्वभौम अधिकार सुम्पिएका छन्। संघीय संसद्को नेतृत्वको र प्रतिनिधि सभाको सभामुखको हैसियतले त्यो अधिकार मबाट अभिव्यक्त हुनुपर्छ,’ उनले भने, ‘त्यो भनेको धेरै असाधारण र त्यो गर्नलाई घण्टा घण्टाका सबै कुरालाई विचार गरेर, मनन गरेर अगाडि बढ्नुपर्छ ।’

सभामुख सापकोटाले आफुँले संविधान बाहिर गएर निर्णय भने नलिने बताए । सभामुखले दलहरुसँगको छलफलपश्चात निर्णय लिने पनि संकेत गरेका छन् ।

उनले भने, ‘योजना र कार्यक्रम म भन्न सक्दिनँ। पार्टीहरूसँग नै छलफल गर्ने हो। पार्टी शक्तिका संवाहक मात्र होइन पावरहाउस पनि हुन्। जनताको शक्ति पार्टीमा पनि हुन्छ ।’

बिहिबारको छलफलमा कानूनविद्हरुले संविधानतः संसद विघटन नभएको हुनाले सभामुखलाई संविधानअनुसार भूमिका खेल्न सुझाब दिएका थिए । यसअघि बुधबार मात्रै उनले पूर्वसभामुखहरुसँग परामर्श लिएका थिए ।

सभामुखले सर्वपक्षीय छलफलपश्चात भूमिका लिने तयारी गरेका छन् । क्रमिक रुपमा उनले गरेको छलफलले पनि त्यहि संकेत गर्दछ । बताइएअनुसार सर्वोच्च अदालतले फैसला गर्नुपूर्व नै उनले कदम चाल्ने तयारी गरेका छन् ।