हामी सबैकाे संसारन्यूज

जेठ १७, काठमाडौं । नेपाली कांग्रेसकी नेतृ डा. डिला संग्रौला पन्तले राष्ट्रपति विद्यादेवी भण्डारीको पछिल्लो सक्रियताप्रति प्रश्न उठाएकी छिन् । उनले आलंकारिक राष्ट्रपतिलाई कार्यकारी बनाउन खोजिएको त होइन भनि आशंका व्यक्त गरेकी छिन् ।

कोभिड–१९ विरुद्वको खोप जुटाउन अन्तराष्ट्रिय समुदायसँग अनुरोध गरिरहेकी राष्ट्रपतिको भूमिकाप्रति संग्रौलाले प्रश्न उठाएकी हुन् । संग्रौलले मन्त्रिपरिषदले खोपको भीम माग्ने अधिकार राष्ट्रपतिलाई दिएको हो भनि प्रश्न गरेकी छिन् ।

सामाजिक सञ्जालमार्फत उनले भनेकी छिन्, ‘बर्तमान सम्माननीय रास्ट्रपतिका क्रियाकलापबाट आम नेपाली जनता सशंकित भएका छन् ।कार्यकारी अधिकार भएको मन्त्रीपरिषदले रास्ट्रपतिलाई पत्राचार गरि भिकरसहयोग माग्ने अधिकार दिएको हो  ? यदि हो भने नेपाली जनताको शीर निहुर्याउने अधिकार सार्बभौम जनताले कसैलाई दिएका छैनन्। के अब मन्त्रीपरिषदका मातहतका निकायले गर्नु पर्ने कार्य पनि सोझै रास्ट्रपतिबाट गराइ रास्ट्रपतिलाई सकृय बनाउन खोजिएको त हैन रु जनतामा शंकाको बादल मडारीएको छ।’

संग्रौलाले आलंङकारी राष्ट्रपतिलाई भीक माग्ने अधिकार संविधानको कुन धारामा छ भनि प्रश्न उठाएकी छिन् । ‘ नेपालको संविधान २०७२ अनुसार आलङकारी रुपमा रहने संस्थाले बिश्वब्यापी रुपमा फैलिएको कोभिड-१९ विरुद्धको खोपको बहाना बनाएर बिश्वका रास्ट्रपतिहरुसँग अनुनयबिनय गर्दै भिक र सहयोग माग्ने अधिकार रास्ट्रपतिलाई संविधानको कुन धारा अन्तरगत प्राप्त हुन्छ ? सोको जानकारी जनतालाई चाहियो,होइन भने यसका अनेकौं अर्थ लाग्न सक्दछन्’, उनले भनेकी छिन् ।

कोभिड–१९ विरुद्वको खोप सहयोग गर्न राष्ट्रपतिले चीनसहित विभिन्न देशका समकक्षीलाई अनुरोध गर्दै पत्र लेखेकी थिइन् । सोमबार मात्रै उनले बेलायतकी महारानीलाई पत्र लेख्दै सहयोग गर्न आग्रह गरेकी थिइन् ।