हामी सबैकाे संसारन्यूज

२६ जेठ, काठमाडौँ । प्रेस काउन्सिल नेपालका पूर्व कार्यवाहक अध्यक्ष, वरिष्ठ पत्रकार तथा जनआस्था साप्ताहिकका सम्पादक किशोर श्रेष्ठ (Kishor Shrestha) ले पूर्वपर्यटन मन्त्री रविन्द्र अधिकारीको मृत्यु अस्वभाविक भएको बताएका छन् ।

सामाजिक सञ्जालमार्फत उनले रविन्द्रको मृत्युलाई अस्वभाविक ठान्दै केही गम्भिर प्रश्नहरु सार्वजनिक गरेका छन् ।
उनले रविन्द्रको मृत्यु बारे अहिले धेरैको मुखमा बुझो लागे पनि एकदिन तथ्यले चिहानबाट निस्केर हुँकार गर्नेछ भनेका छन् । उनले सो मन्त्रालयको योजना बिना मन्त्री रविन्द्रलाई अचानक त्यसदिन ताप्लेजुङ पठाइएको कुरो, उनीसँगका सहयात्रीको प्रश्न, सँगै जानुपर्ने बाध्यता, प्रतिकूल मौषमबीच हतारहतार काठमाडौँ फर्केर त्यहि राती नै अन्त कतै जाने योजना र त्यसक्रममा को कोसँग भेटघाट गर्ने योजना रहेको थियो भन्ने लगायतका सवाल उठाएर सो घटनालाई थप रहस्यमय बनाइदिएका छन् ।

पत्रकार श्रेष्ठले सञ्जालमा लेखेका छन् :
“साथी रविन्द्र, अहिले धेरैको मुखमा बुझो लागे पनि एकदिन तथ्यले चिहानबाट निस्केर हुँकार गर्नेछ । मन्त्रालयगत योजनाबिना तिमीलाई अकस्मात किन त्यसदिन ताप्लेजुङ्ग पठाइयो ? कोसङ्ग पठाइयो ? सङ्गै जानेको उद्देश्य के थियो अनि उनलाई प्रतिकूल मौसमबीच हतार हतार काठमाण्डौ फर्केर त्यही राती नै अन्त कहाँ जानु थियो, बाटैमा कोसँग, के का लागि भेट्ने कुरा तय थियो ?
तिमी अनुशासित कार्यकर्ता, अरुको इच्छा मान्न बाध्य भयौ । आफ्नो निर्वाचन क्षेत्र पोखराको निर्माणाधीन बिमानस्थललाई तिम्रो नाम दिन कन्जुस्याइँ गर्ने मेलोमा किन अहिले त्यही तीतो घटना जोडिएको ताप्लेजुङ्गको सुकेटारसङ्ग टाँसिदैछ ? छेउको विमानस्थलमा कसको नाम हाल्न तिम्रो नामसमेत भजाइँदैछ ? अस्ति भर्खर घर गएका एक जना मन्त्री कमरेडसङ्ग पनि यसबारे कुरा भएको थियो । उनले धेरै कुरा बोल्न र मन खोल्न नमिलेर खै गरे, तिमीलाई गुमाएको पीडामा खुइखुइ गरे ।
तथ्य नमीठो हुन्छ, यसो भन्दा कसै कसैबाट गाली पनि खाइन्छ भन्ने थाहा छ तर साथी, तिम्रो अस्वाभाविक मृत्यु र त्यसपछि सम्मानका नाममा हुन थालेका यावत उपक्रमहरु देख्दा लामो र कष्टकर आन्दोलनको पुरानो सहयात्रीका नाताले मन नमानेर यति लेख्न बाध्य भएको छु ।
फेरि पनि तिमी सधैं मनमा छौ ।
तिम्रो बलिदानको कथा जनजनमा छ ।”