Sansar News
ललिता ‘दोषी’,बुद्धनगर , काठमाडौँ
१.
देश रुँदै छ
आफ्नै स्वार्थ हेर्नाले
फुङ्ग हुँदै छ ।
२.
नेताको मन
किन भयो ढुङ्गाझै
बुझ्नै सकिनँ ।
३.
सधैं छ रात
आए नि लोकतन्त्र
शून्य भो हात ।
४.
बाँदर चाल
अभागी नेपालीको
गिर्दो छ हाल ।
५.
दिन ढल्दै छ
नेपालीको मुटुमा
आगो बल्दै छ ।
६.
निभ्दैन आगो
सम्झेका छन् यो देश
पेवा हो बाको ।
७.
पीडामा देश
लाग्दैन निद्रा कैले
लाग्छ है ठेस ।
८.
आँखा खोल न
देशै ठूलो भनेर
अब बोल न ।
९.
बिन्ती छ नेता
निकास देऊ अब
बुझेर व्यथा ।
१०.
नपरोस् रात
बचाऊ है यो राष्ट्र
देऊ है साथ ।
११.
उदाओस् जून
मुटुमा राखौँ देश
फलाऊँ सुन ।
१२.
बालौँ लौ दियो
नरोपियोस् कसैको
मनमा सियो ।
वि.सं.२०८२ फागुन ३० शनिवार ०६:१० मा प्रकाशित
