हामी सबैकाे संसारन्यूज

कृष्णप्रसाद पौडेल ‘जस्ताधरे’
विदुर -४, बट्टार, नुवाकोट

कर्ममा रमाउँदै विचारले तिखारिँदै ।
ग्रीष्मका वसन्तका अनेक याम सम्झिँदै ॥
लाख लाख वन्दना हुँदा सुरेन्द्र झुल्किऊन् ।
स्नेहले हँसाउने बुबामुमा सुखी रहून् ॥ – १

पुत्रसाथमा वधू मिलेर कर्म हाँक्दछन् ।
गेहमा बुबामुमा प्रसन्नता दिलाउँछन् ॥
स्वर्गतुल्य गेह हो भनेर मान्न तम्सिऊन् ।
स्नेहले हँसाउने बुबामुमा सुखी रहून् ॥ – २

बाल वृद्ध रुग्णका अनेक दुःखकष्ट छन् ।
प्रौढ पुत्र नातिका विभिन्न चालढाल छन् ॥
सख्त जीर्ण व्यक्तिका दशा र विघ्न सिद्धिऊन् ।
स्नेहले हँसाउने बुबामुमा सुखी रहून् ॥ -३

नातिनातिनाहरू रमेर खेल खेल्दछन् ।
झ्यालबाट वृद्ध बा मुमा दुबै नियाल्दछन् ॥
वृद्ध बालबालिका रमाइला कला रचून् ।
स्नेहले हँसाउने बुबामुमा सुखी रहून् ॥ -४

पुत्र नातिनातिना सुकर्ममा सदा भिडून् ।
वृद्ध बा र मातृका हियारका घडा बनून् ॥
गर्वसाथ हर्षका अपार भेल बर्सिऊन् ।
स्नेहले हँसाउने बुबामुमा सुखी रहून् ॥ -५

साथ छोड्नु हुन्न है बुबामुमा र ज्येष्ठका ।
बात सुन्नुपर्छ ती अमूल्य दिव्यखालका ॥
गेह धाम बन्छ है मुरारिका कृपा मिलून् ।
स्नेहले हँसाउने बुबामुमा सुखी रहून् ॥ – ६

छन्द : तूणक / चामर
गण : र – ज – र – ज – र
सङ्केत : ऽ।ऽ – ।ऽ। – ऽ।ऽ – ।ऽ। = ऽ।ऽ
यति: ७ अक्षरमा