हामी सबैकाे संसारन्यूज

जाजरकोट । अविरल वर्षापछि जाजरकोटको भेरी नगरपालिका–२ रिसाङ तथा आसपासका क्षेत्रमा गएको पहिरोमा परी दुई जनाको मृत्यु भएको छ भने दुई जना अझै सम्पर्कविहीन छन् । पहिरोका कारण घर तथा टहरा भत्किनुका साथै ठूलो संख्यामा स्थानीय विस्थापित भएका छन् ।

२०८३ साउन ३० गते दिउँसो करिब ४ बजेदेखि परेको अविरल वर्षाका कारण भेरी नगरपालिका–२ रिसाङलगायतका विभिन्न स्थानमा पहिरो गएको हो । पहिरोमा परी भेरी नगरपालिका–२ का करिब ५२ वर्षीय केदार कार्कीको उपचारका क्रममा मेडिकल कलेज कोहलपुरमा साउन ३१ गते बिहान ४ः५० बजे मृत्यु भएको छ । यसअघि सोही वडाको फारुलाका करिब ५४ वर्षीय उमासिंह खत्री आफ्नै घर भत्किएर पुरिएको अवस्थामा बिहान ८ः५५ बजे मृत फेला परेका थिए ।

पहिरोमा परी भेरी नगरपालिका–२ रिसाङका ६० वर्षीय रामबहादुर शाही गम्भीर घाइते भएका छन् । आरनमा काम गरिरहेका बेला माथिबाट पहिरो खस्दा उनको छाती, टाउको र हातमा चोट लागेको थियो । जिल्ला अस्पताल जाजरकोटमा प्रारम्भिक उपचारपछि थप उपचारका लागि उनलाई मेडिकल कलेज कोहलपुर लगिएको छ । आरन सञ्चालक ४५ वर्षीय सिद्धिबहादुर कामीको पनि ढाडमा चोट लागेको छ । उनलाई उपचारका लागि मेडिकल कलेज कोहलपुर रिफर गरिएको छ ।

त्यस्तै, भेरी नगरपालिका–२ चिसापानीकी ५७ वर्षीया भद्राकली कार्की शरीरका विभिन्न भागमा चोट लागेर गम्भीर घाइते भएकी छन् । उनको जिल्ला अस्पताल जाजरकोटमा प्रारम्भिक उपचारपछि थप उपचारका लागि मेडिकल कलेज कोहलपुर रिफर गरिएको छ ।

भेरी नगरपालिका–१ डौरीकाँडाका ४५ वर्षीय मनवीर चदरा टाउकोमा चोट लागेर घाइते भएका छन् । उनको स्थानीय मेडिकलमा उपचार भइरहेको छ । सोही स्थानका १६ वर्षीया मनिषा विक र ४७ वर्षीया मोतीकला विक पनि घाइते भएका छन् ।

दुई जना अझै बेपत्ता

पहिरोबाट जोगिन भाग्ने क्रममा भेरी नगरपालिका–२ चिसापानीका करिब ७० वर्षीय भीमबहादुर कार्की र सोही वडाकी करिब ८७ वर्षीया रती खत्री सम्पर्कविहीन भएका छन् । उनीहरूको खोजी तथा उद्धार कार्य जारी रहेको छ ।

तीन जना उपचारपछि घर फर्किए

पहिरोमा परी घाइते भएका भेरी नगरपालिका–२ की करिब २३ वर्षीया अनिता कार्की, १० वर्षीय युनिश शाही र ४५ वर्षीया सुन्तली चदराको जिल्ला अस्पताल जाजरकोटमा उपचारपछि साउन ३० गते राति डिस्चार्ज गरिएको छ ।

घर तथा टहरा पूर्ण रूपमा क्षतिग्रस्त

पहिरोले भेरी नगरपालिका–३ स्यालाका पूर्णबहादुर विकको ६ कोठे दुईतले ढुंगा–माटोले बनेको कच्ची घर पूर्ण रूपमा क्षतिग्रस्त भएको छ । घरमा रहेका पाँच जनाको परिवार आफन्तको घरमा आश्रय लिएर बसेका छन् ।

सोही स्थानका भैरवी केसीका दुईवटा टिनका अस्थायी टहरा पनि पूर्ण रूपमा भत्किएका छन् । ती टहरामा भने हाल मानिस बस्दै आएका थिएनन् ।

२०० जनालाई सुरक्षित स्थानमा सारियाे

पहिरोको उच्च जोखिममा रहेको भेरी नगरपालिका–२ रिसाङ क्षेत्रका करिब ६० देखि ७० घरपरिवारका १५० देखि २०० जनालाई त्रिभुवन आधारभूत विद्यालयको भवनमा सुरक्षित राखिएको छ ।

त्यस्तै झ्यालीखेत डाँडामा १६ जना, चिसापानीमा २० जना, राउटेरे डाँडामा १५ जना र रिसाङ फारुलामा तीन जनालाई गरी थप ५४ जनालाई सुरक्षित स्थानमा सारिएको छ । यससँगै पहिरोको जोखिममा रहेका २०० भन्दा बढी स्थानीयलाई तत्कालका लागि सुरक्षित स्थानमा राखिएको छ ।

पैदलै घटनास्थल पुगेर उद्धारमा सुरक्षाकर्मी

पहिरोका कारण विभिन्न स्थानमा सडक तथा पैदल बाटोसमेत अवरुद्ध भएकाले नेपाल प्रहरी, सशस्त्र प्रहरी बल र नेपाली सेनाको टोली जोखिम मोलेर पैदलमार्फत घटनास्थल पुगेको छ । सुरक्षाकर्मीले बेपत्ताको खोजी, घाइतेको उद्धार, प्रभावित परिवारलाई सुरक्षित स्थानमा सार्ने तथा क्षतिको विवरण संकलन गर्ने काम गरिरहेका छन् ।

लगातारको वर्षाका कारण पहिरोको जोखिम कायमै रहेकाले प्रभावित क्षेत्रका बासिन्दालाई थप सतर्क रहन र जोखिमयुक्त स्थानमा नबस्न आग्रह गरिएको छ । विशेषगरी सम्पर्कविहीन दुई जनाको खोजी तथा थप मानवीय क्षति हुन नदिन उद्धार टोलीले प्राथमिकताका साथ काम गरिरहेको छ ।