हामी सबैकाे संसारन्यूज

काठमाडौं । पछिल्लो मतपरिणाम अनुसार समानुपातिकतर्फ ३ प्रतिशत मतको थ्रेसहोल्ड पार गर्दै छ दलहरू राष्ट्रिय पार्टी बन्ने स्थितिमा पुगेका छन् । हालसम्म सार्वजनिक विवरणका आधारमा ३ प्रतिशतभन्दा बढी मत प्राप्त गर्ने छ दलहरू राष्ट्रिय पार्टी बन्ने लायक देखिएका हुन् ।

निर्वाचन आयोगको पछिल्लो विवरण अनुसार राष्ट्रिय स्वतन्त्र पार्टी (रास्वपा) सबैभन्दा धेरै मत प्राप्त गर्दै पहिलो स्थानमा रहेको छ । याे समाचार तयार पार्दा सम्म रास्वपाले समानुपातिक तर्फ ४० लाख ४९ हजार ६०४ मत अर्थात् ४८.४७ प्रतिशत मत प्राप्त गरेको छ । सिटतर्फ पनि रास्वपाले १२५ सिट जित्दै अत्यधिक बहुमतसहित अग्रता कायम गरेको छ।

दोस्रो स्थानमा रहेको नेपाली कांग्रेसले १३ लाख ६० हजार २८१ समानुपातिक मत अर्थात् १६.२८ प्रतिशत मत प्राप्त गर्दै १८ सिट जितेको छ । त्यस्तै नेकपा एमालेले ११ लाख ५० हजार ६७९ समानुपातिक मत अर्थात् १३.७७ प्रतिशत मत प्राप्त गर्दै ९ सिट हासिल गरेको छ ।

यसैगरी नेपाली कम्युनिस्ट पार्टीले ५ लाख ९१ हजार ९४० समानुपातिक मत अर्थात् ७.०८ प्रतिशत मत प्राप्त गर्दै ७ सिट जितेको छ । श्रम संस्कृति पार्टीले २ लाख ९१ हजार ९६५ समानुपातिक मत अर्थात् ३.४९ प्रतिशत मत प्राप्त गर्दै ३ सिट जितेको छ । राष्ट्रिय प्रजातन्त्र पार्टी (राप्रपा) ले २ लाख ७६ हजार ९३१ समानुपातिक मत अर्थात् ३.३१ प्रतिशत मत प्राप्त गर्दै १ सिट हासिल गरेको छ ।

यस आधारमा हालसम्म ३ प्रतिशत मत कटाएर राष्ट्रिय पार्टी बन्ने लायक देखिएका दलहरूमा राष्ट्रिय स्वतन्त्र पार्टी, नेपाली कांग्रेस, नेकपा एमाले, नेकपा, श्रम संस्कृति पार्टी र राष्ट्रिय प्रजातन्त्र पार्टी रहेका छन् ।

यता जनता समाजवादी पार्टी नेपालले १ लाख २५ हजार ८३९ समानुपातिक मत अर्थात् १.५१ प्रतिशत मत मात्र प्राप्त गरेको छ भने अन्य साना दलहरूले पनि ३ प्रतिशतको थ्रेसहोल्ड पार गर्न सकेका छैनन् ।

हालसम्म सार्वजनिक तथ्यांक अनुसार कुल ८३ लाख ५५ हजार १४ मत गणना भएको छ भने १ सय ६४ सिटको परिणाम सार्वजनिक भइसकेको छ । मतगणना जारी रहेकाले अन्तिम परिणामसँगै तथ्यांकमा केही फेरबदल हुन सक्ने निर्वाचन आयोगले जनाएको छ ।

अहिले समानुपतिक तर्फको मतगण्ना जारी छ । मत गणना सम्पन्न पश्चात थ्रेस होल्ड पार गर्न सक्ने दलहरु बढ्न सक्नेछन् ।