हामी सबैकाे संसारन्यूज

१ असार, दिल्ली । भारतमा कोरोना संक्रमणबाट सोमबार ६९ हजार ९५८ जना संक्रमित भएका छन् । आइतबारको तुलनामा संक्रमित हुनेको यो संख्या झण्डै ९ हजारले कमी हो । संक्रमित हुनेको यो संख्या ७६ दिन यताकै कमी हो । यसअघि अप्रिलको पहिलो सातामा ५३ हजार २३७ जना संक्रमित भएका थिए ।

त्यसैगरी भारतमा सोमबार २७३२ जनाको मृत्यु भएको छ । संक्रमित हुनेको संख्या निरन्तर घट्दै आएपनि मृत्युको संख्या भने चिन्ताजनक रहेको त्यहाँका समाचार ऐजेन्सीले जनाएका छन् ।

त्यस्तै आइतबार १ लाख १७ हजार २३२ जना कोरोना संक्रमित निको भएका छन् । भारतमा संक्रमित हुनेभन्दा निको हुनेको संख्या तिब्ररुपमा बढीरहेको छ ।

भारतमा हालसम्म २ करोड ९५ लाख कोरोना संक्रमित भएका छन् । ती मध्ये २ करोड ८२ लाख निको भएका छन् भने ९ लाख ८ हजार सक्रिय संक्रमितको उपचार भइरहेको छ ।

त्यस्तै भारतमा हालसम्म कोरोना संक्रमणबाट ज्यान गुमाउनेको संख्या ३ लाख ७७ हजार पुगेको पनि त्यहाँको स्वास्थ्य मन्त्रालयले जनाएको छ ।