Sansar News
असार ९, काठमाडौं । माधवकुमार नेपाल पक्षीय नेताहरुले दर्ता गरेको नेपाल कम्युनिष्ट पार्टी (एकीकृत)ले दलको मान्यता पाएको छ । निर्वाचन आयोगको जेठ ३० को निर्णयअनुसार बुधबार दल दर्ताको प्रमाणपत्र दिएको हो ।
आयोगको दल दर्ता नं. १६३ मा नेकपा (एकीकृत) नामको दल दर्ता भएको छ । एकीकृतले चुनाव चिन्ह ‘कलम’ पाएको छ ।
नेकपा (एमाले)मा विवाद उत्कर्षमा पुग्दै गर्दा माधव पक्षीय युवा नेता जीवन राईले आयोगमा दल दर्ताको निवेदन दिएका थिए । वैशाख ६ मा दिएको निवेदनमाथि आयोगले जेठ ३० मा निर्णय गरेको थियो ।
दर्ता भएको पार्टीको अध्यक्षमा नेता राई, उपाध्यक्षमा कल्पना गुरुङ्ग, महासचिवमा विनोद खुलाल, सचिवमा ऐनविक्रम कुँवर र कोषाध्यक्षमा सुशील खनाल रहेका छन् ।
नेकपा (एकीकृत)को अध्यक्षसहित सबै नेता माधव पक्षीय नेता तथा कार्यकर्ता हुन् ।
खिमलालको चुनाव चिन्ह थियो कलम
नेता राई माधव पक्षीय नेता हुन् । तर, दल दर्ताबारे भने माधव पक्षले कुनै औपचारिक निर्णय गरेको छैन् । जसबारे नेताहरुले औपचारिक रुपमा कुनै प्रतिक्रिया पनि दिएका छैनन् ।
तर, बागमती प्रदेशबाट राष्ट्रिय सभा सदस्यको लागि भएको उपनिर्वाचनमा विजयी उम्मेदवार डा. खिमलाल देवकोटाले भने चुनाव चिन्हको रुपमा कलम प्रयोग गरेका थिए ।
वि.सं.२०७८ असार ९ बुधवार १७:५० मा प्रकाशित
