हामी सबैकाे संसारन्यूज

१० असार, काठमाडौँ । कोरोना भाइरस विरुद्ध खोपको पहिलो मात्रा एस्ट्राजेन (कोभिसिल्ड) खोप लगाएका व्यक्तिहरुले दोस्रो मात्रा भेरोसेल खोप लगाउँदा अझै बढी प्रभावकारी हुन्छ भनि विश्व स्वास्थ्य संगठनले स्वीकृत गरेको भन्ने समाचार गलत भएको जनाएको छ । प्रेस विज्ञप्ति जारी गर्दै डब्लुएचओले गलत समाचार प्रति ध्यानाकर्षण भएको जनाएको हाे ।

‘विश्व स्वास्थ्य संगठनले यस किसिमको कुनै पनि बयान जारी गरेको छैन र यो झुठो आरोप हो । यस किसिमका गलत सूचनाले जनताको स्वास्थ्यमा गम्भीर परिणाम निम्त्याउन सक्छ’, डब्लुएचओद्वारा जारी विज्ञप्तिमा भनिएको छ ।

भिन्न किसिमका खोपको प्रयोग र प्रभावकारिताका विषयमा अध्ययनहरु भइरहेको जनाउँदै विज्ञप्तिमा एस्ट्राजेनेका (कोभिसिल्ड) खोपको साटो (दोस्रो मात्रामा) भेरोसेल खोप लगाउन मिल्छ भन्ने निष्कर्षमा पुग्नका लागि पर्याप्त वैज्ञानिक प्रमाण आवश्यक रहेको बताइएको छ ।

‘दुई भिन्न किसिमका खोप लगाउँदाको प्रभावकारिताका बारे सीमित तथ्यांकहरु मात्र उपलब्ध छन् । भिन्न किसिमका खोपको प्रयोग र प्रभावकारिताका विषयमा अध्ययनहरु भइरहेका छन् र एस्ट्राजेनेका (कोभिसिल्ड) खोपको साटो (दोस्रो मात्रामा) भेरोसेल खोप लगाउन मिल्छ भन्ने निष्कर्षमा पुग्नका लागि पर्याप्त वैज्ञानिक प्रमाण आवश्यक छ ।’