हामी सबैकाे संसारन्यूज

११ असार, काठमाडौँ । नेकपा(माओवादी केन्द्र)का प्रवक्ता नारायणकाजी श्रेष्ठले पार्टी र नेताहरु बदलिनुमा नै देश र सवैको भविष्य भएको बताएका छन् ।

बिहिबार विपक्षी गठबन्धनले सम्पादकहरुसँग गरेको छलफल कार्यक्रममा पत्रकारहरुले दिएको सुझावलाई ग्रहण गरेर अघि बढ्नु पर्नेमा जोड दिँदै नेता श्रेष्ठले यस्तो अभिव्यक्ति दिएका हुन् ।

सामाजिक सञ्जालमा उनले लेखेका छन् – ढोङ, द्वेध चरीत्र र ब्यक्तिवाद त्याग्दै पत्रकार मित्रहरुको आलोचना र ध्यानाकर्षणलाई आत्मसात गरेर पार्टी र नेताहरु बदलिनुमा नै देश र सवैको भविष्य छ ।

यस्तो छ उनको स्टाटस  :

प्रतिगमन बिरुध्द सँविधान र लोकतन्त्रको पक्षमा सँघर्षरत ५ पार्टीहरुले हिजो काठमाडौंमा आयोजना गरिएको सम्पादक मित्रहरुसँगको अन्तर्क्रिया कार्यक्रम राजनीतिक नेतृत्वले गम्भीरतापुर्वक ध्यान दिनैपर्ने खालको रह्यो।

पत्रकार मित्रहरुले निरङ्कुश केपीतन्न्त्रको बिरुध्द संविधान र लोकतन्त्रको रक्षाको संघर्षमा ५ दल र सञ्चारजगत एकै ठाँउमा रहेको र यो संघर्षलाई सफल पार्नै पर्नेमा जोड दिनुभएको थियो । त्यसका साथै संघर्षरत राजनीतिक पार्टीहरु र नेताहरुले गम्भीर आत्मसमीक्षाकासाथ आफुलाई पनि सच्च्याउनु पर्ने कुरामा उहाँहरुको जोड थियो।उहाँहरुले बिपक्षमा हुँदा मात्र होइन, सरकारमा जाँदा पनि यस्ता कार्यक्रम होस् र आज बोल्नुभएका कुराहरु त्यसबेला ब्यबहारमा लागु गरेको हेर्न पाइयोस भनेर सचेत गराउनुभएको थियो ढोङ, द्वेध चरीत्र र ब्यक्तिवाद त्याग्दै पत्रकार मित्रहरुको आलोचना र ध्यानाकर्षणलाई आत्मसात गरेर पार्टी र नेताहरु बदलिनुमा नै देश र सवैको भविष्य छ ।