हामी सबैकाे संसारन्यूज

असार १३, काठमाडौं । काठमाडौं उपत्यकामा निषेधाज्ञा थप खुकुलो बनाउँदै लम्ब्याउने तयारी गरिएको छ। उपत्यकामा कोरोना संक्रमणको जोखिम कायमै रहेकोले केहि खुकुलो बनाउँदै थप गर्ने तयारी गरिएको ललितपुरका प्रमुख जिल्ला अधिकारी ढुण्डीप्रसाद निरौलाले जानकारी दिए ।

उनले बताएअनुसार निश्चित मापदण्डसहित सार्वजनिक यातायातसमेत सञ्चालन गर्ने सुझाब आएको छ । जसबारे सम्भवतः आज बस्ने सीडीओहरुको बैठकले निर्णय गर्नसक्ने उनले बताएका छन् ।

उपत्यकामा पछिल्लोपटक जारी निषेधाज्ञा यही असार १४ गते (सोमबार) राति १२ बजेदेखि सकिँदै छ। सकिन लागेको निषेधाज्ञाबारे उपत्यकाका तीन जिल्ला (काठमाडौं, भक्तपुर र ललितपुर) का सीडीओहरुको संयुक्त बैठकले थप निर्णय गर्नेछ ।

अहिले समय तोकेर सबै किसिमका पसलहरु खोल्न दिइएको छ। साथै मोटरसाइकल, जीप, कार, भ्यान, ट्याक्सीलगायतमा जोर–बिजोर लागु गरिएको छ ।

हाल सार्वजनिक सवारी–साधन, विद्यालय, मठ–मन्दिर, पार्टी प्यालेसलगायतमा प्रतिबन्ध कायमै छ। सरोकारवालाहरुले निषेधाज्ञा थप खुकुलो बनाउन माग गरेका छन्। न्यूनतम सार्वजनिक यातायातमा मापदण्डसहित सञ्चालन गराउन आग्रह गरेका छन् ।