हामी सबैकाे संसारन्यूज

२३ असार, काठमाडौं । इसेवाका बैंकको किस्ता पनि निःशुल्क तिर्न सकिने भएको छ । जनाइएअनुसार मंगलबारदेखि असार मसान्तसम्म इसेवाका ग्राहकले निःशुल्क यो सेवा प्रयोग गर्न सक्नेछन् ।

इसेवाका प्रमुख कार्यकारी अधिकृत सुभास सापकोटाका अनुसार असार मसान्तसम्म इसेवाका कुनैपनि सदस्यले बैंक तथा वित्तीय संस्थाको किस्ता तिर्दा अथवा रकम पठाउँदा कुनै पनि किसिमको शुल्क तिर्नुपर्ने छैन् । डिजिटल कारोबारलाई प्रोत्साहन गर्ने तथा कोभिड महामारीका बेला सहजै ऋणको किस्ता तिर्न सकियोस् भन्ने उदेश्यले यो सुविधा ल्याएको उनले बताए ।

‘अहिले पनि कोभिड महामारीको अवस्था छ, असार मसान्त भएको हुनाले बैंकको किस्ता तिर्नुपर्ने समस्यामा धेरै ग्राहक हुनुहुन्छ, अर्को तर्फ डिजिटल कारोबारलाई प्रोत्साहन गर्नुपर्ने अवस्था छ’, सापकोटाले भने, ‘यस्तो अवस्थामा थोरै भएपनि लाभ होस् भन्ने उदेश्यले हामीले निःशुल्क किस्ता तिर्न सकिने सुविधा दिएका हौँ ।’

४५ लाख ग्राहक छन् इसेवाका
मोबाइल तथा इन्टरनेटको माध्यमबाट भुक्तानी गर्न सकिने सेवा दिएको इसेवामा हाल प्रत्यक्ष रूपमा खाता खोल्नेको संख्या करिब ४५ लाख पुगेको छ । कम्पनीले जनाएअनुसार करिब एक करोड ६० लाख जनसंख्याले इसेवामार्फत सेवा लिइरहेका छन् ।

हाल इसेवाका देशभर करिब एक लाख १० हजारभन्दा बढि एजेन्ट (इसेवा जोन तथा पोइन्ट) रहेका छन् । हाल इसेवामा मर्चेन्टको संख्या तीन लाख नाघिसकेका छन् ।

इसेवाबाट इन्सुरेन्सको प्रिमियम भुक्तानी, सेयर कारोबारको भुक्तानी गर्न सकिनुका साथै मोबाईल, टेलिफोन, इन्टरनेट, बिजुली तथा खानेपानीको महशुल भुक्तानी, रिचार्ज, हवाइजहाज, बसको टिकटलगायतका शुल्क भुक्तानी गर्न सकिन्छ ।