Sansar News
असार २३, काठमाडौं । कर्णाली प्रदेशसभाका चार सांसदलाई पदमुक्त गर्ने निर्णय कार्यान्वयन नगर्न सर्वोच्च अदालतले दिएको अन्तरिम आदेशमाथि एमाले अध्यक्ष केपी शर्मा ओलीले दर्ता गरेको भ्याकेट निवेदनमाथि आज सुनुवाई हुने भएको छ । उक्त निवेदन न्यायाधीशद्धय विश्वम्भरप्रसाद श्रेष्ठ र नहकुल सुवेदीको संयुक्त इजलासमा सुनुवाई हुन लागेको हो ।
ओलीले गठन गरेको विवादित दशौं राष्ट्रिय महाधिवेशन आयोजक कमिटीले कर्णाली प्रदेशसभाका चार सांसद प्रकाश ज्वाला, नन्दसिंह बुढा, अमरबहादुर थापा र कुर्मराज शाहीलाई पार्टीको ह्वीप उल्लंघन गरेको भन्दै कारबाही गरेको थियो । तर, अदालतले आयोजक कमिटीको वैधतामाथि प्रश्न उठाउँदै पुनर्वहालीको आदेश दिएको थियो । गत जेठ २७ मा न्यायाधीश प्रकाशमानसिंह राउतको एक इजलासले उनीहरुमाथि गरिएको कारबाही बदर गर्दै पुनर्वहाली गर्न आदेश गरेको थियो ।
अदालतले महाधिवेशन आयोजक कमिटीको बैधतामाथि प्रश्न उठाउँदै राजनीतिक दलसम्बन्धी ऐनअनुसार उक्त कमिटीले कुनै पनि सदस्यलाई प्रष्टिकरण सोध्ने र कारबाही गर्न नसक्ने ठहर गरेको थियो । तर, ओलीले उक्त आदेशमाथि भ्याकेट निवेदन हालेका थिए ।
हाल उक्त कमिटीलाई केन्द्रीय कमिटीको रुपमा रुपान्तरण गरिएको छ । असार १६ मा बैठक राख्दै ओलीले उक्त कमिटीलाई नै केन्द्रीय कमिटीमा रुपान्तरण गर्ने निर्णय गरेका थिए । अहिले एमालेभित्र उक्त निर्णयमाथि विवाद छ ।
साथै ओलीले अदालतमा बुझाएको भ्याकेट निवेदनमाथि पनि एमालेको माधवकुमार नेपाल पक्षले विरोध गर्दै आईरहेको छ । एमाले विवादमा सहमती खोजिएको बेला भ्याकेट निवेदनमाथि सुनुवाई हुन लाग्नुलाई अर्थपूर्णं रुपमा हेरिएको छ ।
वि.सं.२०७८ असार २३ बुधवार १३:१० मा प्रकाशित
