Sansar News
असार २९, काठमाडौं । नेकपा (एमाले)का अध्यक्ष केपी शर्मा ओली पक्षले युथफोर्सलाई पुनः ब्यूँताउने घोषणा गरेको छ । मंगलबार सर्वोच्च अदालतको आदेशविरुद्व आन्दोलनको घोषणा गर्दै ओली पक्षीय युवा संघ नेपालले युथफोर्स ब्यूँताएको घोषणा गरेको हो ।
ब्यूँतिएको युथफोर्सको कमाण्डरमा युवा संघका वरिष्ठ उपाध्यक्ष क्षितिज थेवे र उपकमाण्डरमा पुष्प श्रेष्ठ चयन भएका छन् । ५०१ सदस्यीय रहने गरि युथफोर्सको कमिटी गठन गरिएको बताइएको छ ।
देश गम्भीर संकटतर्फ उन्मुख हुँदै गएको भन्दै आन्दोलनका कार्यक्रमलाई व्यवस्थित बनाउन युथ फोर्सको गठन गरिएको बताइएको छ ।
युवा संघका इन्चार्ज महेश बस्नेतले जनमतलाई सर्वोच्च अदालतले कुल्चेको भन्दै जनताको आन्दोलन आवश्यक भएको बताए । उनका अनुसार युथफोर्सले देशव्यापी रुपमा गलत राजनीतिको सशक्त प्रतिकार गर्नेछ ।
शान्ति प्रक्रियालगत्तै तत्कालिन वाईसीएलविरुद्व लड्न एमालेले २०६५ सालमा महेश बस्नेतको नेतृत्वमा युथफोर्स गठन गरेको थियो ।
वि.सं.२०७८ असार २९ मंगलवार १३:५८ मा प्रकाशित
