Sansar News
२९ असार, काठमाडौं । यातायात व्यवसायीहरु आफूहरुका ७ बुँदे माग तत्काल पूरा गर्न भन्दै आन्दोलनमा उत्रिएका छन् ।
व्यवसायीयहरुले भाडा समायोजन तथा यातायात सम्बन्धीत व्यक्तिहरुलाई कोभिड–१९ को खोप तत्काल लगाउनुपर्ने लगायतका सात बुँदे माग तत्काल पूरा गर्न भन्दै आन्दोलनमा उत्रिएका हुन् ।
उनीहरुले कोभिड १९ को खोप, मौद्रिक नीतिमा व्यवसायीका समस्या समावेश गरिनुपर्ने, यातायातको वीमा छुट गरिनुपर्ने, यातायातको कागजात र नविकरण गरिनुपर्ने, यातायातको भाडा समायोजन गरिनुपर्ने (पर्यटन, यातायातको भाडादर निर्धारण र ट्याक्सीको फ्लाकडाउन कायम गर्ने), २० वर्ष सवारीको अवधि थप गरिनुपर्ने र सडक कानुन लागू गरिनुपर्ने (ढुवानी यातायातको वर्तमान नीति पुनरावलोकन गर्ने) सातबुँदे माग राखेर आन्दोलनमा उत्रिएका हुन् ।
आन्दोलनमा उत्रिएका सार्वजनिक यातायात केन्द्रीय महासंघ नेपालका अध्यक्ष डोलनाथ खनालले आफूहरुले पटक–पटक माग राख्दा पनि सम्बोधन नभएकोले आन्दोलनमा उत्रन बाध्य भएको बताएका छन् ।
कोरोना भाइरसको महामारीका कारण गरिएको लकडाउनका कारण यातायात व्यवसाय नै धरापमा परेको भन्दै सरकारले विशेष राहत दिनुपर्ने व्यवसायीहरुले माग गर्दै आएका छन् ।
महासंघले यसअघि यातायात व्यवसायीका समस्या समाधान निम्ति प्रधानमन्त्री केपी शर्मा ओलीलाई ७ बुँदे मागपत्र बुझाउँदै समय सिमाभित्र माग पूरा नभए सबै प्रकारका सवारी साधनको साचो श्रावण ५ गते सरकार लाई बुझाउने चेतावनी समेत दिएको थियो ।
वि.सं.२०७८ असार २९ मंगलवार १४:०७ मा प्रकाशित
