हामी सबैकाे संसारन्यूज

१९ साउन, काठमाडौं । सुगर मिलहरुले उखुको भुक्तानी नदिएको भन्दै किसानहरुले आन्दोलनका कार्यक्रमहरु गर्दै आएको अवस्थामा एक सुगर मिलले भने आफूले किसानहरुलाई दिनुपर्ने सबै रकम भुक्तानी गरेको भन्दै सूचना नै जारी गरेको छ ।

रौतहटको श्रीराम सुगर मील्सले मंगलबार एक सूचना नै जारी गरेर आफ्नो उद्योगले किसानबाट खरिद गरेको उखुको सबै रकम भुक्तानी गरिसकेको जनाएको हो ।

उद्योगले उखु किसानबाट खरिद गरेको उखुको रकम भुक्तानी रु ३ करोड बाँकी रहेको भनी विभिन्न संचारमाध्यमहरुबाट समाचार आएको भन्दै त्यसप्रति ध्यानाकर्षण भएको समेत जनाएको छ ।

‘यस उद्योगले उखु किसानबाट खरिद गरेको उखुको भुक्तानी गर्न बाँकी रहेको बक्यौता रकम मिति २०७७ पुष ३ गते देखि सुचारु गरी भुक्तानी गरिसकेको तथ्य व्यहोरा हाम्रा सबै उखु किसानहरुलाई जानकारी नै छ,’ मीलद्धारा जारी सूचनामा भनिएको छ, ‘यस उद्योगले स्थानीय स्तरमा नै विभिन्न पत्रपत्रिकामा सूचना समेत प्रकाशित गरी बाँकी रहेको बक्यौता रकम बुझिलिनका लागि जानकारी गराएको र सोहि बमोजिम हाम्रा उखु किसानहरुले बाँकी रहेको बक्यौता रकम बुझि लिएको समेत सबैमा अवगत गराउन चाहान्छौं ।’

उद्योगले यदि कोही किसान रकम लिनबाट छुट भएको भए उचित सक्कल प्रमाणसहित कारखानामा उपस्थित भइ रकम भुक्तानी लिन समेत उद्योगले अनुरोध गरेको छ । file photo