Sansar News
भदौ १४, काठमाडौं । बालुवाटारमा सत्ता गठबन्धनको बैठक बसिरहेको छ । प्रधानमन्त्रीको सरकारी निवास बालुवाटारमा बसिरहेको बैठकमा सत्ता गठबन्धनका पाँच दलका नेताहरु सहभागी छन् ।
बैठकमा मन्त्रिपरिषद् विस्तार, गठबन्धनका दलहरुले पाउने मन्त्रालयलगायतका विषयमा टुंगो लगाउनेबारे छलफल भइरहेको बताइएको छ ।
जारी बैठकमा नेपाली कांग्रेसका सभापति एवं प्रधानमन्त्री शेरबहादुर देउवा, नेकपा (माओवादी केन्द्र)का अध्यक्ष पुष्पकमल दाहाल प्रचण्ड, नेकपा (एकीकृत समाजवादी)का अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादव र संघीय परिषद् अध्यक्ष बाबुराम भट्टराईलगायतका शीर्ष नेताहरुको सहभागीता रहेको छ।
नेकपा एमालेबाट विभाजित भएर बनेको नेकपा एकीकृत समाजवादीले निर्वाचन आयोगबाट आधिकारिकता पाएसँगै सरकार विस्तारबारे गठबन्धनमा छलफल सुरु भएको हो।
यसअघि आइतबार सम्पन्न शीर्षनेताको बैठकले आज सरकारलाई पूर्णता दिने निर्णय गरेका थिए। आजै टुंग्याउने तयारी गरिए पनि गठबन्धनका दलबीच कतिपय विषयमा छलफल गर्नुपर्ने भएकाले सम्भव नभएको जनाइएको छ।
सरकार गठनको झण्डै डेढ महिना बित्न लाग्दा पनि मन्त्रिपरिषदले पूर्णंता नपाउँदा सरकारको आलोचना हुने गरेको छ ।
वि.सं.२०७८ भदौ १४ सोमवार ११:१७ मा प्रकाशित
