भदौ ३१, काठमाडौं । नेकपा (एमाले)का अध्यक्ष केपी शर्मा ओलीले एमालेबाट सडे/गलेका तत्व मात्रै बाहिरिएको टिप्पणी गरेका छन् । बिहीबार एमालेको काठमाडौं जिल्ला कमिटीलाई सम्बोधन गर्दै उनले माधवकुमार नेपाल नेतृत्वको समूह बाहिरिँदा खास एमालेलाई फाईदै भएको बताए ।
‘एमालेको शक्ति परिवर्तन खासै भएको छैन्, हामी हिजो सत्तामा थियौं आज प्रतिपक्षी मात्रै भएका छौं, खासै फरक भएका छैनौं’, ओलीले भनेका छन्, ‘ २/४ सडेका तत्वका, बिग्रेका तत्वहरु बाहिरिएका हुन्’, पार्टी जहाँको तहिँ छ ।’
ओलीले पार्टी उपाध्यक्ष अष्टलक्ष्मी शाक्यले नेता नेपाललाई पुनः एमालेमै फर्किन गरेको आग्रहलाई पनि विरोध गरेका छन् । माधव नेपालले पार्टीभित्र समस्या मात्रै खडा गरेको भन्दै ओलीले किन भित्र्याउने भनि प्रतिप्रश्न गरे ।
‘केही साथीहरुले माधव नेपाललाई आउनुस् भन्नुहुन्छ, किन आउने ? माधव नेपाल के फुटाउनलाई आवश्यक छ ?’, ओलीले भने, ‘ पार्टीमा छउन्जले माधव नेपालले कहिल्यै पार्टी र सरकारको पक्षमा बोलेको सुन्नुभयो ?’
सोही कार्यक्रममा सम्बोधन गर्ने क्रममा नेतृ अष्टलक्ष्मी शाक्यले माधव नेपालले लिएको बाटो गलत भएको भन्दै एमालेमै फर्किन आग्रह गरेकी थिइन् ।
वि.सं.२०७८ भदौ ३१ बिहीवार १६:०३ मा प्रकाशित