Sansar News
काठमाडौं । कोरोना महामारीका विचमा पनि गत आर्थिक वर्ष रेमिटेन्समा कमी नआएपनि चालु आर्थिक वर्षको २ महिनामा रेमिटेन्स घटेको छ ।
कोरोना महामारीका कारण बैदेशिक रोजगारीमा जानेको संख्या घट्दा यसअघि नै रेमिट्यान्समा गिरावट आउने अनुमान गरिएको थियो ।
नेपाल राष्ट्र बैंकले सोमबार प्रकाशित गरेको चालु आर्थिक वर्षको दुई महिनामा एक खर्ब ५५ अर्ब ३७ करोड रेमिटेन्स देश भित्रिएको छ । गत वर्षको सोहि अवधिको तुलनामा ६.३ प्रतिशतले कमी हो ।
अघिल्लो वर्षको सोहि अवधिमा रेमिटेन्स आप्रवाह ८.१ प्रतिशतले बढेको थियो । अमेरिकी डलरमा रेमिटेन्स आप्रवाह ५.८ प्रतिशतले कमी आई १ अर्ब ३१ करोड रहेको छ । अघिल्लो वर्ष यस्तो आप्रवाह २.६ प्रतिशतले बढेको पनि मंगलबारको नागरिक दैनिकमा समाचार छ ।
कोरोना महामारीपछि कैयन गन्तव्य मुलुकबाट मागपत्र नआउँदा बैदेशिक रोजगारमा जानेको संख्यामा कमी आएको हो । हालसम्म श्रम स्वीकृति जारी भएको आधारमा सबैभन्दा ठूलो गन्तव्य मलेसिया रोजगारी कोरोना महामारीपछि ठप्प छ । अधिकारीहरुले मलेसिया रोजगारी सुरु हुन अझै केही समय लाग्ने बताएका छन् भने कोरीया पनि सुचारु हुन सकेको छैन ।
वि.सं.२०७८ कात्तिक ९ मंगलवार ०८:५० मा प्रकाशित
