Sansar News
काठमाडौं । प्रेस सेन्टर नेपालको अध्यक्षमा विष्णु सापकोटा ‘जुगल’ विजयी भएका छन् ।
नेकपा (माओवादी केन्द्र) निकट मानिने प्रेस सेन्टरको शनिवार र आइतवार दुईदिन चितवनमा भएको चौथो राष्ट्रिय महाधिबेशनले सापकोटालाई सेन्टरको अध्यक्षमा चयन गरेको हो ।
सापकोटासँगै अध्यक्षका अर्का दाबेदार गोविन्द रोका ‘सचिन’ ले अध्यक्ष पदबाट आफ्नो दावेदारी हटाएपछि सापकोटाको नाममा सहमति भएको थियो । रोकाकै प्रस्तावमा सापकोटा अध्यक्ष पदमा निर्वाचित भएका हुन् ।
प्रेस सेन्टरको अध्यक्षमा सापकोटाको नाममा सहमति जुटेपनि अन्य पदाधिकारीको विषयमा सहमति हुन नसकेको बताइएको छ ।
महाधिबेशनले सेन्टरको १९९ सदस्यीय केन्द्रीय सदस्य चयन गर्नुपर्ने भएपनि हालसम्म १८४ केन्द्रीय सदस्यको नाम मात्रै घोषणा भएको छ । १९९ मध्ये ८ पदाधिकारी महाधिबेशनले मनोनयन गर्नेछ । नयाँ कार्यसमितिको आजै बस्ने बैठकले पदाधिकारीको टुङ्गो लाग्ने जनाइएको छ । बन्दसत्रले १८ बुँदे घोषणापत्र जारी गरेको छ ।
वि.सं.२०७८ मंसिर १९ आइतवार १९:४५ मा प्रकाशित
