हामी सबैकाे संसारन्यूज

काठमाडाैं । नेकपा (एमाले)का अध्यक्ष केपी शर्मा ओलीले शेयर बजारबारे माओवादी केन्द्रका अध्यक्ष पुष्पकमल दाहाल ‘प्रचण्ड’को टिप्पणी चन्दा नपाएपछि आएको अभिव्यक्ति रहेको आरोप लगाएका छन् । बुधबार पार्टीका मनोनित केन्द्रीय सदस्यहरुलाई सपथ ग्रहण गराउँदै उनले यस्तो टिप्पणी गरेका हुन् ।

ओलीले प्रचण्ड लेनिनभन्दा बढी जान्ने बन्दै प्रतिक्रिया दिएको बताए ।’शेयरमा लगानी गर्ने जनताको जीवन के असर पर्छ कुनै मतलब छैन । कुन शेयर कारोबारीले चन्दा दिएन होला । अब म ध्वस्त पारिदिन्छु भनेर उनले त्यस्तो भनिदिए,’ ओलीले भने ।

आफूले त्यस्तो टिप्पणी गरेको खण्डमा सडकमा ठूलो आन्दोलन भइसक्ने ओलीको भनाइ थियो । केही दिनअघि प्रचण्डले शेयर बजार साम्राज्यवादकाे विकसित रूप रहेकाे टिप्पणी गरेका थिए ।