हामी सबैकाे संसारन्यूज

काठमाडौं । नेपाली सूचना प्रविधि (आईटी) क्षेत्रका नवप्रवर्तनकारी उत्पादन तथा सेवाहरूलाई अन्तर्राष्ट्रिय स्तरमा प्रवद्र्धन गर्ने उद्देश्यसहित प्रतिष्ठित ‘एसोसियो डिजिटल एआई अवार्ड २०२६’ का लागि आवेदन खुला गरिएको छ ।
एसियन–ओशिनियन कम्प्युटिङ इन्डस्ट्री अर्गनाइजेसनले आयोजना गर्ने उक्त अवार्डमा नेपालबाट डिजिटल अर्थतन्त्र तथा आर्टिफिसियल इन्टेलिजेन्स (एआई) क्षेत्रमा उल्लेखनीय योगदान पुर्‍ याइरहेका कम्पनी तथा संस्थाहरूले सहभागिता जनाउन सक्नेछन् ।

यस वर्षको अवार्डको मुख्य थिम “नेपाली टेक उद्यमी अवसरः आफ्ना उत्पादन र सेवाहरूलाई विश्वव्यापी रूपमा प्रदर्शन गर्नुहोस् र एसोसियो डिजिटल एआई अवार्ड २०२६ प्राप्त गर्नुहोस” रहेको आयोजकले जनाएको छ ।

एसोसियोका उपाध्यक्ष नवराज कुँवरले नेपाली प्रविधि उद्यमीहरूका लागि यो अवार्ड अन्तर्राष्ट्रिय मञ्चमा आफ्नो क्षमता प्रमाणित गर्ने ऐतिहासिक अवसर भएको बताए । उनका अनुसार यसले नेपाली उत्पादन तथा सेवाको विश्वव्यापी पहुँच विस्तार गर्न सहयोग पुर्‍ याउनेछ ।

त्यस्तै, क्यान महासंघका कार्यवाहक अध्यक्ष चिरञ्जीवी अधिकारीले सम्पूर्ण नेपाली प्रविधि कम्पनी, स्टार्टअप तथा सरोकारवालाहरूलाई आवेदन दिन आग्रह गर्दै नेपाली प्रविधिको सकारात्मक प्रभाव विश्वसामु उजागर गर्ने यो उपयुक्त मञ्च भएको उल्लेख गरे ।

क्यान महासंघका महासचिव चन्द्रविलास भुर्तेलले आवेदन प्रक्रियालाई सहज र प्रभावकारी बनाउन महासंघले पूर्ण सहजीकरण गर्ने प्रतिबद्धता व्यक्त गरेका छन् ।

आठ विधामा अवार्ड प्रदान गरिने

यस वर्ष एआईको प्रयोगमार्फत विभिन्न क्षेत्रमा रूपान्तरण ल्याउने उत्कृष्ट परियोजनालाई आठ विधामा सम्मान गरिने आयोजकले जनाएको छ । जसअन्तर्गत साइबर सुरक्षा, सार्वजनिक हित, शिक्षा, स्वास्थ्य, स्मार्ट कृषि, वित्तीय सेवा, भविष्यका सीप तथा जनशक्ति विकास, र उत्पादन तथा सप्लाइ चेन व्यवस्थापन क्षेत्रमा एआई प्रयोग गर्ने संस्थाहरूलाई अवार्ड प्रदान गरिने छ ।

क–कस्ले आवेदन दिन पाउँछन् ?

अवार्डका लागि कर्पोरेट संस्था, स्टार्टअप, सरकारी निकाय, प्राज्ञिक तथा अनुसन्धान संस्था, गैरनाफामूलक संस्था लगायतले आवेदन दिन सक्नेछन् । प्रस्तावित एआई समाधान कम्तीमा पाइलट चरणमा कार्यान्वयन भएको हुनुपर्ने र विगत २४ महिनाभित्र स्पष्ट नतिजा देखाएको हुनुपर्ने मापदण्ड तोकिएको छ ।
त्यस्तै एक संस्थाले एक विधामा मात्रै आवेदन दिन सक्ने व्यवस्था गरिएको छ ।

आवेदन दिने मिति कहिलेसम्म ?

आयोजकका अनुसार प्रतियोगितामा आवेदन दिने अन्तिम मिति १५ मे २०२६ तोकिएको छ । विजेताहरूको घोषणा ३० मे २०२६ मा गरिनेछ भने अवार्ड वितरण समारोह ३० जुलाई २०२६ मा ‘एसोसियो डिजिटल एआई समिट २०२६’ को अवसरमा आयोजना गरिने जनाइएको छ ।

आवेदन कसरी दिने ?

इच्छुक संस्थाहरूले तोकिएको ढाँचाअनुसार ४ देखि ५ पृष्ठको प्रस्ताव पीडीएफ फम्र्याटमा बुझाउनुपर्नेछ । प्रस्तावमा कभर पेज, कार्यकारी सारांश, संस्थाको पृष्ठभूमि, एआई परियोजनाको प्राविधिक उत्कृष्टता तथा उत्तरदायी एआई व्यवस्थापन सम्बन्धी विवरण समावेश गर्नुपर्ने आयोजकले जनाएको छ ।