हामी सबैकाे संसारन्यूज

काठमाडौं । नेपालको तीव्र रूपमा विकसित हुँदै गएको फिनटेक तथा डिजिटल भुक्तानी क्षेत्रले अन्तर्राष्ट्रिय मञ्चमा महत्वपूर्ण पहिचान बनाउन सफल भएको छ। Global Fintech Awards (GFA) 2026 अन्तर्गत नेपालका पाँच प्रमुख फिनटेक तथा डिजिटल भुक्तानी कम्पनी विभिन्न विधामा नामांकित तथा सर्टलिस्ट भएका छन्।

आयोजकबाट प्राप्त आधिकारिक विवरणअनुसार Citytech Group Pvt. Ltd., eSewa Limited र IME Khalti Limited ‘Best Fintech from Nepal’ विधामा सर्टलिस्ट भएका छन्। त्यस्तै, IMARK Pvt. Ltd. ‘Best Payments Solution’ र Fonepay Payment Service Limited ‘Best Digital Public Infrastructure’ विधामा नामांकित भएका छन्।

‘Best Fintech from Nepal’ विधामा सर्टलिस्ट भएको Citytech Group डिजिटल भुक्तानी तथा फिनटेक पूर्वाधार निर्माणमा सक्रिय प्रविधि कम्पनी हो। यसको finPOS लगायतका भुक्तानी तथा मर्चेन्ट टेक्नोलोजी समाधानले बैंक तथा वित्तीय संस्था र व्यवसायलाई डिजिटल भुक्तानी प्रणालीसँग जोड्न महत्वपूर्ण भूमिका खेल्दै आएको छ।

त्यस्तै, eSewa नेपालको डिजिटल वालेट तथा डिजिटल भुक्तानी क्षेत्रमा अग्रणी कम्पनीमध्ये एक हो। डिजिटल वालेट, बिल भुक्तानी, डिजिटल कारोबार तथा विभिन्न वित्तीय सेवामार्फत eSewa ले डिजिटल वित्तीय पहुँच विस्तारमा योगदान पुर्‍याउँदै आएको छ।

IME Khalti ले पनि डिजिटल वालेट, भुक्तानी तथा वित्तीय प्रविधिका क्षेत्रमा आफ्नो उपस्थिति विस्तार गर्दै डिजिटल कारोबारलाई थप सहज, सुरक्षित र पहुँचयोग्य बनाउन योगदान दिँदै आएको छ।

‘Best Payments Solution’ विधामा नामांकित IMARK Pvt. Ltd. ले भुक्तानी प्रविधि तथा समाधानका क्षेत्रमा अन्तर्राष्ट्रिय स्तरमा आफ्नो क्षमता प्रस्तुत गरेको छ। विभिन्न देशका नवीन भुक्तानी समाधान तथा प्रविधिसँग प्रतिस्पर्धा गर्ने यस विधामा नेपाली कम्पनीको नामांकनलाई महत्वपूर्ण उपलब्धिका रूपमा हेरिएको छ।

नेपालको डिजिटल भुक्तानी पूर्वाधारमा महत्वपूर्ण भूमिका खेल्दै आएको Fonepay Payment Service Limited ‘Best Digital Public Infrastructure’ विधामा नामांकित भएको छ। Fonepay को नामांकनले नेपालमा डिजिटल भुक्तानी पूर्वाधारको विकास, पहुँच विस्तार तथा डिजिटल वित्तीय प्रणालीलाई सुदृढ बनाउने प्रयासलाई अन्तर्राष्ट्रिय मञ्चमा प्रस्तुत गरेको छ।

सेप्टेम्बरमा अवार्ड घोषणा

Global Fintech Fest 2026 आगामी ८ देखि ११ सेप्टेम्बर २०२६ सम्म भारतको मुम्बईस्थित Jio World Centre र Trident BKC मा आयोजना हुँदैछ।

आयोजकका अनुसार Global Fintech Awards Night 2026 सेप्टेम्बर १० गते साँझ ६ बजे आयोजना हुनेछ। सोही अवसरमा विभिन्न विधाका विजेताहरू घोषणा गरिनेछन्।

नेपालका पाँच कम्पनी तीन फरक अन्तर्राष्ट्रिय विधामा नामांकित तथा सर्टलिस्ट हुनु नेपालको फिनटेक इकोसिस्टमका लागि उल्लेखनीय उपलब्धि हो। यसले नेपाली कम्पनीहरू घरेलु बजारमा मात्र सीमित नभई क्षेत्रीय तथा अन्तर्राष्ट्रिय स्तरमा समेत प्रतिस्पर्धा गर्न सक्षम हुँदै गएको संकेत गरेको छ।

यस उपलब्धिले नेपालको डिजिटल वित्तीय रूपान्तरण, डिजिटल भुक्तानी, वित्तीय समावेशिता, मर्चेन्ट डिजिटाइजेसन तथा डिजिटल सार्वजनिक पूर्वाधारको क्षेत्रमा भइरहेको प्रगतिलाई अन्तर्राष्ट्रिय मञ्चमा उजागर गरेको छ।

Citytech Group, eSewa, IME Khalti, IMARK र Fonepay को विभिन्न विधामा अन्तर्राष्ट्रिय अवार्डका लागि नामांकन तथा सर्टलिस्ट हुनु नेपाली फिनटेक तथा डिजिटल वित्तीय इकोसिस्टमकै सामूहिक उपलब्धिका रूपमा हेरिएको छ।