Sansar News
काठमाडौं । प्रतिनिधिसभाको आगामी बैठकमा एमसीसीसँग सम्झौता टेबल हुने भएको छ । बालुवाटार स्रोतले जनाएअनुसार प्रधानमन्त्री शेरबहादुर देउवा एमसीसीको विषयमा संसदमै बृहत छलफल गर्ने गरि अगाडि बढाउन लागि परेका हुन् ।
बताइएअनुसार देउवा मंगलबार शुरु भएको हिउँदे अधिवेशनको पहिलो बैठकले सम्झौता टेबल गर्न चाहेका थिए । देउवा सम्झौता टेबल गर्ने विषयमा गठबन्धनभित्रका दलहरुसँग पनि छलफल गरेका छन् ।
देउवाले माओवादी अध्यक्ष पुष्पकमल दाहाल ‘प्रचण्ड’सँग पटक–पटक छलफल गरेका छन् । प्रचण्डले भने सर्वदलीय छलफल गरी टुंगोमा पुग्न आग्रह गरेको बुझिएको छ ।
प्रचण्ड संशोधन नगरी एमसीसीलाई संसदमा अघि बढाउने पक्षमा नरहेको बुझिएको छ । तर देउवाले भने आगामी बैठकमा एमसीसी टेबल गर्ने र त्यसपश्चात सर्वदलीय बैठक राख्ने तयारीमा छन् ।
देउवाको अडानका कारण गठबन्धनभित्र भने असन्तुष्टी बढेको बुझिएको छ ।
एमालेको निरन्तर अवरोधको कारण मंगलबार स्थगित बैठक आगामी पुस ६ मा बोलाइएको छ ।
वि.सं.२०७८ मंसिर २९ बुधवार १६:१५ मा प्रकाशित
