Sansar News
काठमाडौं । नेपाली कांग्रेसको १४ औं महाधिवेशनअन्तर्गत महामन्त्री पदका लागि भएको निर्वाचनको मतगणना जारी छ । मतगणनामा महामन्त्री पदका उम्मेदवार गगन थापा निकै अगाडि देखिएका छन् ।
२१२० मत गन्दा थापाले १३८५ मत ल्याएका छन् । जुन ६० प्रतिशतभन्दा माथि हो ।
मतगणनाको पछिल्लो नतिजामा थापासँगै अर्का उम्मेदवार विश्वप्रकाश शर्मा पनि देखिएका छन् । उनले हालसम्मको मतगणनामा ८५१ मत पाएका छन् ।
थापा र शर्मा पछि अन्य उम्मेदवारहरुको भने केही कमजोर उपस्थिति छ । मतपरिणामअनुसार प्रकाशशरण महतले ६९८, प्रदीप पौडेलले ६२१ र मीनेन्द्र रिजालले ३६५ मत पाएका छन् । यस्तै राजाराम कार्कीले हालसम्म ५९ मत पाएका छन् ।
सबैभन्दा धेरै मत पाएर अग्रता कायम गरेका गगन थापा कोइराला प्यानलका उम्मेदवार हुन् भने शर्मा प्रकाशमान सिंह प्यानलका उम्मेदवार हुन् ।
देउवा प्यानलका उम्मेदवार महत र पौडेल हुन् । यता निकै नै नगन्य मत पाएका कार्की विमलेन्द्र निधि प्यानलका उम्मेदवार हुन् ।
सभापतिमा दोस्रो चरणको निर्वाचनबाट थप मोर्चाबन्दीसहित जित हाँसिल गरेपनि शेरबहादुर देउवा नेतृत्वको प्यानल महामन्त्रीको पदका लागि भएको निर्वाचनमा भने निकै कमजोर सावित भएको छ । थापा र शर्माका अगाडि देउवा पक्षका उम्मेदवारहरु निकै फिका देखिएका छन् ।
वि.सं.२०७८ पुस १ बिहीवार १३:२८ मा प्रकाशित
