Sansar News
काठमाडौं । नेकपा (माओवादी केन्द्र) को आठौं राष्ट्रिय महाधिबेशन राजधानीमा सुरु भइसकेको छ ।
आइतवार विभिन्न राजनीतिक दलका शिर्षस्थ नेताहरुको उपस्थितिमा राजधानीको प्रज्ञाप्रतिष्ठानमा पार्टीका अध्यक्ष पुष्पकमल दाहाल ‘प्रचण्ड’ ले महाधिबेशनको उद्घाटन गरेका हुन् ।
मंसिर ११ देखि १५ सम्म चल्ने उक्त महाधिबेशनको आज दोस्रो दिनबाट बन्द सत्र सुरु हुनेछ । बन्दसत्रमा पार्टीका अध्यक्ष पुष्पकमल दाहाल ‘प्रचण्ड’ ले राजनीतिक प्रतिवेदन प्रस्तुत गर्ने र सो प्रतिवेदनमाथि छलफल गर्ने कार्यक्रम रहेको छ ।
झण्डै १६ सय महाधिबेशन प्रतिनिधिहरुको सहभागीता रहने उक्त बन्दशत्रमा पार्टीको विधान संशोधन लगायतका विषय समेत छलफलका लागि पेश हुनेछन् ।
माओवादी केन्द्रको सुरु आठौं महाधिबेशनले पार्टीमा १५ पदाधिकारीसहित २९९ सदस्यीय केन्द्रीय समिति चयन गर्नेछ । पार्टीमा अध्यक्ष, वरिष्ठ उपाध्यक्ष, ६ उपाध्यक्ष, १ महासचिव, २ उपमहासचिव, ३ सचिव र एक कोषाध्यक्ष सहित १५ पदाधिकारी रहनेछन् ।
वि.सं.२०७८ पुस १२ सोमवार ०८:५९ मा प्रकाशित
