हामी सबैकाे संसारन्यूज

काठमाडौं । प्रधानमन्त्री शेरबहादुर देउवा पत्नी आरजु राणा यतिबेला भारत भ्रमणमा छिन् । उनले भारतीय सत्तारुढ दलका नेताहरुसँग भेटघाट गरिरहेकी छिन् ।

आरजुले नयाँ दिल्लीमा सत्तारुढ भाजपाका विदेश विभाग प्रमुख विजय चौथाइवालेसँग विशेष भेटघाट गरेकी छिन् । उनले गरेको भेटलाई चौथाइवालेले सामाजिक सञ्जाल ट्वीटमार्फत सार्वजनिक गरेका थिए । उनले सामाजिक सञ्जाल ट्विटरमा भनेका छन्, ‘निजी भ्रमणमा दिल्लीमा रहेकी डा. आरजु राणा देउवासँग मेरो आज अत्यन्त सौहार्दपुर्ण भेट भयो ।’

भाइको उपचारका लागि भन्दै दिल्ली गएकी थिइन आरजु

आरजु गत पुस ११ मा मुटुको समस्याबाट पीडित भाइ भुषण राणाको उपचारका लागि भन्दै नयाँ दिल्ली गएकी थिइन् । उनका भाइको उपचार दिल्लीस्थित फोर्टिज अस्पतालमा जारी छ । बताइएअनुसार त्यहाँ आरजुका भाइको मुटुको सल्यक्रिया भएको छ ।

दिल्ली यात्रा नितान्तः पारिवारिक र स्वास्थ्य उपचारका लागि भएको कुरा आरजुले बताएकी थिइन् । उनले कुनै पनि राजनीतिक भेटघाट नगर्ने भनेकी थिइन् ।

Today, I had a very coordial meeting with Dr Arzoo Rana Deuba , who is currently on a personal visit to New Delhi. @NepaliCongress pic.twitter.com/FfSbK6yRJT

— Dr Vijay Chauthaiwale (@vijai63) January 2, 2022

देउवा भ्रमणको चाँजोपाँजो मिलाउँदै

राजनीतिक भेटघाट नगर्ने भनेकी आरजुले दिल्लीमा भने गोप्य रुपमा राजनीतिक भेटघाटलाई बढाएकी छन् । आरजुले बढाएको भेटघाटलाई प्रधानमन्त्री देउवाको भारत भ्रमणको तयारीको रुपमा हेरिएको छ ।

भारतीय प्रधानमन्त्री नरेन्द्र मोदीको गृहराज्यमा हुन लागेको भाइब्रेन्ट गुजरात ग्लोबल समिटमा  सहभागि हुन प्रधानमन्त्री देउवा पुस २६ मा गुजरात जाँदैछन् । मोदी उक्त समिटमा नेपालसहित दक्षिण एसियाली अन्य मुलुकका राष्ट्र प्रमुखलाई पनि आमन्त्रण गरेको छ ।

तर, प्रधानमन्त्री भए यताको पहिलो भारत भ्रमणका भएको कारण देउवाले उक्त भ्रमणलाई राजनीतिक बनाउन खोजेको बुझिएको छ । कांग्रेस उच्च स्रोतले बताएअनुसार देउवाले भ्रमणलाई राजकीय बनाउन प्रयास गरेका छन् । आरजुको भेटघाटलाई सोही प्रयासको निरन्तरताको रुपमा बुझिएको छ । यसअघि स्कटल्याण्ड भ्रमणका क्रममा देउवाले मोदीसँग साइडलाइन भेट गरेका थिए ।